تاسې د وېبسایټ داسې بڼه ګورئ چې یوازې متن لري او لږ انټرنېټ کاروي. که غواړئ عکسونه او ویډیوګانې وګورئ، نو د وېبسایټ اصلي (لومړنۍ) بڼې ته ورشئ.
د وېبسایټ اصلي بڼې ته مې وروله
د وېبسایټ دې بڼې په اړه چې ډېر انټرنېټ نه مصرفوي نور معلومات دلته موندلای شئ.
د پرېکون کمپاین له کبله په نړیواله کچه د مکډونالډ پلور راټیټ شوی
د امریکا مکډونالډ شرکت پخپل اصلي خرڅلاو کې پاتې راغلی او د پلور کچه یې پر غزه د اسرائیلو د روانې جګړې د "ښکاره ملاتړ" له کبله راټیټه شوې ده.
د مکډونالډ د چټکو خواړو برخې له کابو څلورو کلونو راهیسې پخپل پلور کې د لومړني زیان خبره کړې ده.
وړاندې یې مشر ویلي وو چې په غزه کې د جګړې له کبله یې پلور کې کموالی راغلی دی او ملامتیا یې په ښکاره پر "ګمراه کوونکو معلوماتو" اچولې ده.
له دې اعلان وروسته د مکډونالډ ونډې په سلو کې نژدې څلور راټیټې شوې دي.
مکډونالډ د سټاربکس او کاکولا په څېر له هغو ګڼو لوېدیځو شرکتونو یو دی چې د اسرائیلو ضد فعالانو له لوري او د لاریونونو له کبله یې ګڼو ځایونو کې پرېکون اعلان شوی دی.
دا پرېکون وروسته له هغه ډېر شو چې مکډونالډ یوه وېډیو او انځورونه خپاره کړل چې پکې د دوی تولیدات په وړیا توګه د اسرائیلو پوځ ته وېشل کېدل.
دغه شرکت ویلي په غزه کې د اسرائیلو جګړې "تر ډېره" د ۲۰۲۳ کال به وروستۍ ربعه کې د دوی پر بهرني پلور اغېز کړی دی.
د مکډونالډ اجرائیوي مشر کریس کیمبکزینسکي وویل، د دوی فعالیتونه په مالیزیا، اندونیزیا او فرانسه کې اغېزمن شوي او په منځني ختیځ کې یې اغېز تر ډېره محسوسېږي.
نوموړي وویل: "تر هغه چې دا جګړه روانه وي، تمه نه لرو چې په خپلو تولیداتو او پلور کې کوم پاموړ ښه والی ووینو."
