تاسې د وېبسایټ داسې بڼه ګورئ چې یوازې متن لري او لږ انټرنېټ کاروي. که غواړئ عکسونه او ویډیوګانې وګورئ، نو د وېبسایټ اصلي (لومړنۍ) بڼې ته ورشئ.
د وېبسایټ اصلي بڼې ته مې وروله
د وېبسایټ دې بڼې په اړه چې ډېر انټرنېټ نه مصرفوي نور معلومات دلته موندلای شئ.
عمران خان په دوو قضیو کې بې ګناه بلل شوی، درېیمه کې یې ضمانت منل شوی
د اسلام اباد یوې ځايي محکمې د پاکستان پخوانی لومړی وزیر عمران خان د لاریونونو پر مهال د تاوتریخوالي په تړاو دوو قضیو کې بې ګناه بللی.
قاضي له محکمې وغوښتل، چې عمران خان ته د لاریونونو (لانګ مارچ) په درشل کې د ورانکارۍ او حکومتي ودانیو ته د زیان اوښتو په دوو قضیو کې برائت ورکړي.
محکمې هم عمران خان ته په هغو قضیو کې برائت ورکړ، چې د تاوتریخجنو لاریونونو پر مهال ثبت شوې وې او پر نوموړي تور پورې شوی و چې مرسته یې ورسره کړې.
محکمې ویلي، په یادو قضیو کې د مدعي لخوا داسې کوم ثبوت نه دی وړاندې شوی، چې د تورن عمران خان خلاف جرم ثابت کړي نو محکمه په دغو قضیو کې د عمران خان د برائت غوښتنه مني.
د یادونې ده، چې عمران خان په ۲۰۲۲ کال کې له ۱۴۴ مادې څخه په سرغړونې او دولتي ودانیو ته په زیان اړولو تورن شوی و.
هممهاله، د اسلام اباد عالي محکمې د القادر ټرسټ قضیه کې د پخواني لومړي وزیر ضمانت منلی او د هغه د خوشې کول امر کړی دی.
همدارنګه محکمې حکم کړی، چې لس لکه پاکستانۍ روپۍ د ضمانت په ډول ورته کېږدي.
د عالي محکمې قاضي عامر فاروق د عمران خان د غوښتنې په تړاو پرېکړه وکړه او د هغه د خوشې کولو امر یې وکړ.
سره له دې چې د القادر ټرسټ قضیه کې عالي محکمې د نوموړي د خوشې کولو امر کړی، خو نوموړی به لا هم په زندان کې وي، ځکه پر هغه د عدت په وخت د نکاح کولو تور پاتې دی.
د عمران خان او بشرا بي بي پر ضد د عدت په دوران کې د نکاح قضیې پرېکړه د روانې مې میاشتې تر ۲۳مې نېټې ځنډول شوې ده.
د عمران خان خلاف د ۱۹۰میلیون پونډو قضیه څه ده؟
د القادر ټرسټ قضیه په اصل کې د څلور سوه پنځوس کانالې ځمکې د ورکړې په تړاو ده، چې د بحریه ټاون لخوا القادر پوهنتون ته ورکړل شوې وه.
اسلام اباد کې د احتساب یوې محکمې (ناب) عمران خان او د هغه مېرمن بشریٰ بي بي د ۱۹۰ میلیون پونډو مالي فساد قضیه کې رسماً تورن کړي وو، خو دواړو له دې تورونو انکار کړی دی.
په دې قضیه کې د کور جوړولو یوې شخصي ادارې (بحریه ټاون) څښتن ملک ریاض او زوی یې علي ریاض هم شامل دي.
همدارنګه په یاده قضیه کې د پاکستان احتساب ادارې مخکینی سلاکار مرزا شهزاد اکبر، د پاکستان مخکینی وزیر زلفي بخاري، فرحت شهزادۍ او ضیا المصطفی نسیم هم شامل دي.
د پخواني لومړي وزیر عمران خان او بشرا بي بي خلاف د نکاح قضیې کې محکمې د خاور مانیکا وکیل رضوان عباسي ته لارښوونه کړې، چې په انلاین بڼه د ویډیو له لارې د محکمې بهیر ته حاضر شي او خپل دلایل وړاندې کړي.
د عمران خان وکیل سلمان اکرم محکمې ته وویل، چې د بشرا بي بي د پخواني خاوند خاور مانیکا وکیل رضوان عباسي له هېواده بهر ځي.
نوموړي محکمې ته په خپلو خبرو کې وویل، که د محکمې د بهیر پر مهال ښاغلی عباسي په ډنمارک کې پاتې شي او ووايي چې نه شم درتلی بیا به څه کوو؟
د محکمې لخوا وړاندیز وشو، چې د وېډیو له لارې دې خپل دلایل وړاندې کړي.
له دې وړاندې د اسلام اباد سترې محکمې د توشه خانې په قضیه کې د عمران خان او بشرا بي بي سزا ځنډولې وه.
