تاسې د وېبسایټ داسې بڼه ګورئ چې یوازې متن لري او لږ انټرنېټ کاروي. که غواړئ عکسونه او ویډیوګانې وګورئ، نو د وېبسایټ اصلي (لومړنۍ) بڼې ته ورشئ.
د وېبسایټ اصلي بڼې ته مې وروله
د وېبسایټ دې بڼې په اړه چې ډېر انټرنېټ نه مصرفوي نور معلومات دلته موندلای شئ.
طالبان ایران ته: افغان بندیان خوشي او کډوالو ته د بانکي حسابونو ستونزه حل کړئ
په افغانستان کې د طالبانو حکومت له ایراني چارواکو غوښتي چې په دې هېواد کې افغان زندانیان راخوشي او کډوالو ته د بانکي حسابونو ستونزې حل کړي.
دا خبرې د طالبانو د بهرنیو چارو سرپرست امیر خان متقي کابل کې د افغانستان په چارو کې د ایران ولسمشر له ځانګړي استازي او کابل کې د دې هېواد له نوي سفیر حسن کاظمي قُمي سره لیدنه کړې چې د طالب سرچینو په وینا ښاغلي قُمي په دې اړه د پوره همکارۍ ډاډ ورکړی دی.
ښاغلی متقي له ایراني سفیر سره د افغانستان د زېربنايي او اقتصادي پروژو په اړه هم غږېدلی.
د طالبانو د بهرنیو چارو وزارت مرستیال ویاند حافظ ضیاء احمد پر ټویټر لیکلي، په دې لیدنه کې ایراني لوري د افغانستان معادنو، انرژۍ، اورګاډي پټلۍ او ځینو نورو برخو کې پانګونې ته چمتووالی وښود.
بله خوا، په افغانستان کې د طالبانو حکومت د کډوالو او بېرته راستنېدونکو چارو وزارت وایي، په ایران کې د افغان کډوالو ستونزو د حل په موخه به د دواړو هېوادونو ترمنځ دوه اړخیزه تخنیکي کمېټه جوړه شي. چارواکي وايي د همداسې یوې ورته کمېټې د جوړولو په اړه به له پاکستاني چارواکو سره هم خبرې وکړي.
د یاد وزارت ویاند مولوی عبدلمطلب بي بي سي ته ویل چې دا کمېټې د هغې څلور اړخیزې ناستې په پایله کې جوړېږي چې څو ورځې وړاندې په تهران کې ترسره شوه.
ددغه وزارت د معلوماتو له مخې، دا مهال شاوخوا ۷ میلیون افغانان په بېلابېلو هېوادونو کې د کډوالۍ ژوند کوي چې له دې ډلې شاخوا درې میلیونه یې په ایران، درې میلیونه یې په پاکستان او پاتې نور یې په نورو هېوادونو کې مېشت دي.
