طالبان وايي د ګاونډیو هېوادونو د برېښنا ۶۲۷ میلیونه ډالره پور یې ورکړی
- Author, هدایت الله همیم
- دنده, بي بي سي
د افغانستان د برېښنا شرکت وايي، د تېر حکومت له وخت ورپاتې د ازبکستان، تاجکستان، ترکمنستان او ایران د برېښنا ۶۲۷ میلیونه ډالره پور پاتې و، چې د طالبانو له بیا واکمنېدا وروسته دا پور ورکړل شوی دی.
د ۲۰۲۲ کال په اګسټ میاشت کې د طالبانو د حکومت د برېښنا شرکت چارواکو ویلي وو، له کورنيو او بهرنیو سرچینو یې د وارداتي برېښنا د لګښت په برخه کې ۱۵۱ میلیونه ډالره پور ادا کړی او ۱۲۲ میلیونه ډالره پور لا هم پرې پاتې دی.
د برېښنا شرکت ویاند حکمت الله میوندي وايي : "د افغانستان ډېره برخه برېښنا وارداتي ده، چې د هېواد اتیا سلنه برېښنا له ګاونډیو هېوادنو (ازبکستان، تاجکستان او ترکمنستان) څخه افغانستان ته واردېږي."
د ښاغلي میوندي په وینا، د ۲۰۲۱ کال د اګسټ له ۱۵مې (پر واک د طالبانو له بیا واکمنېدا) وروسته د برېښنا شرکت پر وړاندې یوه لویه ستونزه د تېر جمهوریت د واکمنۍ پرمهال د ګاونډیو هېوادونو د برېښنا پورونه پر افغانستان پاتې وو.
نوموړی وايي، څه باندې دوه کاله وړاندې په افغانستان کې د اقتصادي بندیزونو او ستونزو سربېره د طالبانو حکومت څلور واړو ګاونډیو هېوادونو (د ازبکستان، تاجکستان، ترکمنستان او ایران) ته ۶۲۷ میلیونه ډالره زاړه پورونه تادیه او د برېښنا په تاریخ کې دا لومړی ځل دی چې ګاونډیو هېوادونو ته يې مخکې اداینه هم کړې ده.
دې لیکنه کې له social media راخیستل شوي مواد شته. له ښودلو وړاندې یې ستاسې اجازه پکار ده، ځکه ښایيکوکیز یا بله تکنالوژي پکې کارول شوې وي. کولی شئ له اجازې مخکې د social media site پالیسي ولولئ. د دې لپاره غوښتنه ومنئ او مخکې لاړ شئ
د پوسټ X پای
د برېښنا شرکت ویاند وايي، په کور د ننه د برېښنا د کمي پوره کولو لپاره پر داخلي سرچینو هم کار روان دی چې په وینا یې د یوه سټراټيژیک پلان له مخې به افغانستان په راتلونکو پنځو کلونو کې د داخلي سرچینو په مټ ۷۱۰ مېګاواټه برېښنا ولري.
افغانستان کې د کارېدونکې برېښنا ډېره برخه وارداتي ده چې څه باندې پنځوس سلنه یې ازبکستان ورکوي.
افغانستان د اړتیا وړ ډېره برېښنا له ازبکستان، ترکمنستان او ایران واردوي چې هر کال د ژمي په موسم کې د هېواد ډېری اوسېدونکي د برېښنا له پرچاوۍ سره مخامخېږي.
د روان ۱۴۰۲ کال د جدي میاشتې لومړیو کې برېښنا شرکت ویلي وو چې تر ۲۰۲۴ کال پورې به ددغه شرکت او تاجکستان ترمنځ د برېښنا تړون وغځول شي.
د تېر ۲۰۲۳ کال په لومړیو کې افغانستان کې د برېښنا شرکت ویلي وو چې افغانستان ۱۳۶۰ مېګاواټه برېښنا ته اړتیا لري خو دوی په کور دننه او له وارداتي سرچینو یوازې ۹۶۰ مېګاواټه برېښنا ترلاسه کوي.
