کاناډا ته د تګ لپاره واده؛ نجلۍ ترې تللې او هلک یې پرېښی

"هلک او نجلۍ به کاناډا ته د تللو لپاره واده کوي، نجلۍ به هلک کاناډا ته ورغواړي او بیا یې باید طلاق کړي او ترې بېل شي."

دا د هغې هوکړې ټکي دي چې د ۲۰۲۳ کال جنوري په ۲۰مه د هند پنجاب ایالت په کاپورتالا ښار کې د هلک او نجلۍ د کورنیو له خوا لاسلیک شوې ده.

د دې هوکړې یوه کاپي بي بي سي هم ترلاسه کړې.

په دې هوکړه کې همدا راز راغلي، چې نجلۍ به د (IELTS) اسناد ترلاسه کوي، د دې اسنادو د ترلاسه کولو لپاره به د نجلۍ د زدکړو لګښت هم هلک په غاړه اخلي او په بدل کې به یې بیا هلک د مېړه په نامه کاناډا ته ورغواړي.

ویل شوي چې هلک د نجلۍ د مور او پلار ګاڼي هم خپل کور کې ځکه خوندي کړي، چې نجلۍ له دې هوکړې په شا نه شي.

واده وشو، خپل خپلوانو یې پکې ګډون کړی و، خو د نجلۍ کورنۍ یې کاناډا ته له تګ سره مخالفت کاوه.

د دوی په وینا "دا واده نه بلکه کاناډا ته د تګ هوکړه ده."

خو د کورنۍ له مخالفت سربېره نجلۍ کاناډا ته ولاړه، د نجلۍ او هلک تر منځ اړیکې خرابې شوې او خبره تر محکمې ورسېده.

اوس په کاپورتالا کې د نجلۍ او کورنۍ پر ضد قضیه روانه ده او دا پېښې په اړه پلټنې روانې دي.

د ۴۵ میلیونه روپیو د دوکې ادعا

په دې قضیه کې مدعي بلجیت جاګي (مستعار نوم) د پنجاب کاپورتالا اوسېدونکی دی.

د بلجیت په وینا، کورنۍ یې هوکړه وکړه چې د مستعار نومې سواتي "قراردادي" واده خپل کشري زوی سهراب سره وکړي.

د سهراب او سواتي تر منځ ۹ کاله د عمر توپیر و.

د هوکړې له مخې، د بلجیت جاګي کورنۍ باید د سواتي د واده او په کاناډا کې د هغې د زدکړو ټول لګښت په غاړه واخلي او په بدل کې به یې کاناډا ته د سواتي له تګ سره سم سهراب دغه هېواد ته ورغواړي.

سواتي او سهراب په ۲۰۱۹ کال کې واده وکړ، په همدغه کال سواتي د کاناډا تحصیلي ویزه ترلاسه کړه او لاړه.

د دې هلک د کورنۍ په وینا، دوی ۴۵ میلیونه روپۍ لګښت کړی دی.

بلجیت وايي، له تګ وړاندې نجلۍ ډاډ ورکړی و، چې کاناډا ته له رسېدو سره سم به سهراب سره په اړیکه کې شي، خو دا کار یې و نه کړ اوسهراب په هند کې ومړ.

په ۲۰۲۳ کال کې سواتي بېرته هند ته راغله او په مارچ میاشت کې یې د سهراب مشر ورور بلجیت جاګي سره واده وکړ.

د دوی تر منځ د عمر توپیر بیا ۱۳ کاله و.

د جګي په خبره، دا واده له کوم فشار پرته شوی و. دویم ځل هم د واده ټول لګښت د بلجیت کورنۍ په غاړه واخیست.

سواتي هند کې د شل ورځو تېرولو وروسته بېرته کاناډا ته ستنه شوه او ژمنه یې وکړه چې ډېر ژر به بلجیت کاناډا ته غواړي.

بلجیت جاګي پولیسو ته ویلي، سواتي له تګ وروسته د دوی اړیکي نه ځوابوي او نه یې هم د دوی ټلفیوني اړیکو ته ځواب ورکړی دی.

د هغې په وینا، مور او لور دوی په ۴۵ میلیونه روپیو دوکه کړي دي.

"دویم واده په خوښه او رښتینی واده و"

بي بي سي له کاویتا او د هغې له کاناډايۍ لور سره هم په دې اړه خبرې کړي دي. آغلي سویتي وايي، د بلجیت تورونه بې بنسټه دي.

نوموړې ويلي، د دوی په واده کې هېڅ کومه هوکړه نه ده شوې او ریښتینی واده و.

هغې منلې چې، د ویزې او زدکړو لګښت د هلک کورنۍ ورکړی دی.

مېرمن سویتي همدا راز ویلي چې دوه ځله یې د سهراب ویزې لپاره غوښتنه کړې خو ویزه یې نه ده ترلاسه کړې، او له هغې ورسته سهراب مړ شو.

سواتي وايي، په د ۲۰۲۳ کال مارچ کې یې د دواړو خواوو په خوښه د سهراب مشر ورور سره واده وکړ.

هغه وايي: "کاناډا ته چې راغلم بلجیت راسره تل اړیکه کې و او ځورولم یې ځکه مې اړیکې ورسره خرابې شوې."

نوموړې دا هم مني چې لا یې د بلجیت د ویزې لپاره غوښتنه نه وه کړې.

د سویتي مور کاویتا هم وايي، چې د بلجیت او سویتي تر منځ پر ټیلیفون لانجه شوې او له هغې وروسته یې اړیکه لا پسې خرابه شوې.

هند کې ډېره موده کېږي چې کاناډا ته د تګ لپاره د هوکړې له مخې(قراردادي) ودونه کېږي.

په دې ودونو کې نجلۍ آیلټس ازموینه ورکوي او داسې یوه هلک سره واده کوي چې کاناډا کې د هغې لګښتونه ورکړي، خو په بدل کې به یې هلک کاناډا ته ورغواړي.

دا په حقیقت کې واده نه بلکه کاناډا ته د هلک د تګ ویزه ده.