عبدالصمد روحاني له لښکرگاه څخه

	چاودنه د گرشک ولسوالۍ په مرکز کې د برېښنا دفتر ته څېرمه په يوه پاىه کې شوې ده

د هلمند ولايت د پوليسو مشر محمدحسين انډيوال وويل چې چاوېدونكي توكې د برېښناپه دفتر كې ځاى پرځاى شوى وو .

وسله والو طالبانو ددې يېښې پړه پرغاړه اخيستې ده .

چاودنه د شنبې په ورځ (د مارچ٢٩) سهار د ګرشك ولسوالۍ د برېښنا دكاركوونكو په دفتركې شوې چې په پايله كې د برېښنا دوه تنه كاركوونكي وژل شوي او د دوو ولسي وګړو ترڅنګ يې شپږ تنه نور حكومتي مامورين ټپيان كړي دي .

د هلمند امنيه قومندان مل پاسوال محمدحسين انډيوال وايې چې چاودېدونکي توكې له مخكې په دفتركې ځاى پرځاى شوي وو .

امنيه قومندان وايي چې په دې اړه پلټنې كوي چې دا چاودېدونكي توكي څه ډول د مامورينو دفتر ته وړل شوي وو .

د هلمند د برېښنا رئيس حاجي اهل الله عبيدي وايي چې په چاودنه كې يې د برېښنا سټېشن ته كوم زيان نه دى اوښتى .

عيني شاهدان وايي چې د چاودنې غږ دومره زور ور وو، چې ډېرې ليرې پرتې سيې يي هم ولړزولې .

وسله وال طالبان وايي چې په ګرشك ولسوالۍ كې په يوه چاودنه كې لسو تنو پوليسو ته مرګ ژوبله اړولې .

دقاري يوسف احمدي په نامه يوه طالب وياند په دې اړه معلومات نه دي وركړي چې چاودنه د برېښنا داسټېشن وه خو د هلمندچارواكي وايي چې په ګرشك كې بله چاودنه نه ده شوې .

ګرشك ولسوالي د هلمند د مركز شمال لورته په دېرش كيلومترۍ كې پرته ده .

دوې ورځې وړاندې هم په دې ډول يوه بمي چاودنه كې چې دپوليسو پرګاډي شوې وه يو پوليس مړ او دوه تنه يې ټپيان كړي ول .

بل پلو د افغانستان دكورنيو چارو د وزرات له خوا د نيمروز په خاشرود ولسوالۍ كې د شپږو طالبانو دوژل كېدو خبروركړل شوى دى .

د نيمروز چارواكي وايي چې په وژل شوو طالبانو كې د ملاطيب اغاپه نامه يوطالب قومندان هم شامل دى .

چارواكي وايي جګړه په خاشرود ولسوالۍ كې وروسته له هغه وشوه چې طالبانو دكوكنارو دكمپاين د پوليسو پريوه كتار بريد وكړ .

په دغه نښته كې شپږوتنو پوليسو ته هم مرګ ژوبله اوښتې ده .

وسله وال طالبان دخپلو دوو کسانو وژل كېدل مني اوترڅنګ يې د ٢٠ تنوافغان سرتېرو د وژل كېدو ادعاكوي .