عبدالصمد روحاني له لښکرگاه څخه

	چاودنه د سيمه ييزو خلکو په يوه ولسي مېله کې شوې ده .

چارواكي وايي چاودنه په يوې سيمه ييزه مېله كې، چې په سلګونو كسان پكې راټول شوي ول شوې ده .

د هلمند امنيه قومندان محمدحسين انډيوال ددې چاودنې پړه دحكومت پر
وسله والو مخالفينو ور اچولې ده .

په همدې ولسوالۍ كې د چارشنبې په ورځ (د مارچ ٢٦) په يوه بله چاودنه كې يوافغان سرتېرى وژل شوى او دوه کسان نور ټپيان شوي دي .

چارواكي وايي چاودنه دګرشك ولسوالۍ په مالګير سيمه كې هغه مهال وشوه کله چې په سلګونو سيمه ييز خلك په يوه ولسي مېله كې سره راغونډ شوي وه .

د هلمندامنيه قومندان مل پاسوال محمدحسين انډيوال بي بي سي ته وويل چې دچاودنې په پايله كې اته تنه ولسي وګړي مړه او١٧ تنه نور ټپيان شوي دي .

هغه وويل چې چاودېدونکي توكې په يوه سراچه موټركې ځاى پرځاى شوي ول، چې د خلكو په منځ كې د ريموټ په واسطه چول شويي دي .

يوشمېرعيني شاهدانو بي بي سي ته وويل چې په چاودنه كې يې د مړو د بدن ټوټه ټوټه غړي ترليرې ځايه پورې پراته ليدلي دي .

كه څه هم د وسله والو طالبانو ويندويانو تر اوسه په دې اړه څه نه دي ويلي، خو يوشمېركسان چې ځانونه د تليفون پرليكه وسله وال طالبان راپېژني، وايي چې دغه چاودنه دوى كړې ده .

طالبان ادعا كوي چې په چاودنه كې ډېره مرګ ژوبله ځايي پوليسو ته اوښتې ده .

په ګرشك ولسوالۍ كې تر دې پېښې وړاندې يوه بله چاودنه د پوليسو پر يوه ګاډي شوې وه .

چارواكي وايي چې پوليسو په سربند سيمه كې ګزمه كوله چې دسپرلۍ ګاډى يې پر يوه ښخ شوي ماين وختوت .

د هلمند امنيه قومندان ښاغلى انډيوال وايي چې د چاودنې په پايله كې يو پوليس مړ او دوه تنه نور ټپيان شوي دي .

وسله وال طالبان په دې چاودنه كې د شپږو پوليسو د وژل كېدا خبره كوي .

د هلمند په مارجې ولسوالۍ كې بيا د كوكنارو د له منځه وړلو پركمپاين بريد شوى، چې د چارواكو په وينا پوليسو ته پكې كوم زيان نه دى اوښتى .