افغانستان د روسيې څه باندې لس ميليونه ډالرو پور سربېره، له تېرو کلونو څخه د امريکا د متحدو ايالاتو ١٠،٨ ميليونه ډالره او د جرمني ٤٠ ميليونه ډالره هم پوروړى و .

تېره يکشنبې (د مارچ ٢) د افغانستان د ماليې وزير ډاکټر انوار الحق احدي کابل کې په يوه خبري ناسته کې اعلان وکړ چې سعودي عربستان د افغانستان ٢٥ ميليونه امريکايي ډالرو پور وباښۀ .

ښاغلي احدي وويل د سعودي عربستان هغه پور، چې د ولسمشر محمد داود خان د حکومت پرمهال يې (له ١٣٥٧) کال څخه افغانستان ته ورکړى و، معاف کړ .

ښاغلي احدي له سعودي عربستان څخه د مننې په ترڅ کې وويل چې دغه هېواد د پاريس کلوپ ته له راتلو او د ملگرو ملتونو د سازمان له پرېکړې پرته د خپل پور بښلو ته حاضر شوى دى .

د ماليې وزير وويل چې روسيې، جرمني او د امريکا متحده ايالاتو هم په روان ٢٠٠٨ کال کې خپل پورونه ، چې له پخوانيو کلونو راپدېخوا پر افغانستان پاتې وو، بخښلي دي .

د ښاغلي احدي پرو ينا، افغانستان د روسيې څه باندې لس ميليونه ډالرو پور سربېره، له تېرو کلونو څخه د امريکا د متحدو ايالاتو ١٠،٨ ميليونه ډالره او د جرمني ٤٠ ميليونه ډالره هم پوروړى و .

د افغانستان د ماليې وزارت د چارواکو په وينا ،دغو دوه هېوادونو هم تېر کال د پاريس په کلوپ کې د خپلو پورونو د بخښنې ژمنه کړې ده .