د خوست والي وايي تر سلو زيات خوستي وگړي د بگرام په زندان کې اچول شوي چې زياتره يې د شخصي دوښمنيو له امله بنديان کړاى شوي .

ښاغلي ارسلا جمال په خوست کې يوې خبرې ناستې ته وويل د بگرام په زندان کې له شپږ سوو بنديانو څخه تر سلو زيات بنديان د خوست ولايت دي .

ښاغلى جمال په بگرام کې د خوست ولايت د بنديانو له خولې وايي بهرني سرتېري په ډېره بې رحمۍ سره بې گناه ښځې، ماشومان او ولسي وگړي له ځانه سره بېولي دي .

د خوست والي په افغانستان کې له مېشتو بهرنيو ځواکونو وغوښتل چې د شپې پرمهال په خپل سري توگه د ولسي وگړو پر کورونو له يرغل لاس واخلي .

ده وويل تر سلو زيات خوستي وگړي د بگرام په زندان کې اچول شوي چې زياتره يې د شخصي دوښمنيو له امله بنديان کړاى شوي .

د خوست والي ووىل ددغو بنديانو برخليک معلوم نه دى او دا هم معلومه نه ده چې دوى به څومره وخت په زندان کې پراته وي .

ښاغلي جمال د بهرنيو ځواکونو له چارواکو وغوښتل چې افغان بنديان دې دولت ته وسپاري .

هغه ټينگار وکړ چې دغه بنديان بايد د افغانستان ددولت تر څارنې لاندې وساتل شي، بې گناه بنديان خوشي کړاى شي او تورنو کسانو ته سزا ورکړل شي .

ښاغلي جمال زياته کړه چې افغانان له خپلو بنديانو سره په ژبه ښه پوهېږي .

دا په داسې حال کې ده چې يو شمېر خوستي بنديان له افغان دولت سره د مخالفت په تور نيول شوي دي، چې بيا بهرنيو ځواکونو د گوانتانامو زندان ته لېږدولي دي .