دوه اوونۍ وړاندې هم په خوست کې د يوې چاودنې په پايله کې د کمپاين (پوځيانو) ځلور تنه سرتېري وژل شوي ول .

په خوست کې چارواکي وايي دغه چاودنه په صبريو (يعقوبي) ولسوالۍ کې نن سې شنبې (د فبروري ٢٦) سهار شاوخوا نهه بجې وشوه .

د صبريو ولسوال لطف الله بابکرخېل بي بي سي ته وويل د چاودنې موخه د دې ولسوالۍ د پوليسو پر ټولى مشر قومندان رازق نور وه .

نوموړى وايي د پوليسو ټولى مشر سهار له خپل کوره ددندې پر لور روان و چې سراچه ډوله موټر يې د سړک پرغاړه خښ شوي ماين وخوت .

ښاغلى بابکرخېل زياتوي په دې چاودنه کې د رازق نور په گډون دده څلور نور ساتونکي پوليس، چې دوه يې زامن او دوه نور يې خوريونه ول، وژل شوي دي .

خو د کورنيو چارو وزارت په يوه تازه خپره شوې خبرپاڼه کي ويلي چې د ريموټ کنټرول په وسيله د سړک د غاړې ماين چاودنې په دې پېښه کې څلور ملي پوليس او يو بې گناه ماشوم وژل شوي دي .

د صبرو ولسوال ددغې پېښې پړه پر د هېواد او سولې پر دوښمنانو اچوي .

بل پلو له يو ناڅرگند ځاى څخه د وسله والو طالبانو يو تن وياند ويلي چې ماين ددوى لخوا خښ کړاى شوى و او د پوليسو نوموړى افسر ددوى تر څارنې لاندې و.

د سويل ختيځ خوست ولايت د صبريو ولسوالۍ يو له هغو سيمو څخه ده چې گڼ شمېر بهرني او افغان پوځيان پکې مېشت دي او دغه ولسوالي هر وخت د تاوتريخوالي شاهده ده .

دوه اوونۍ وړاندې هم په خوست کې د يوې چاودنې په پايله کې د کمپاين (پوځيانو) ځلور تنه سرتېري وژل شوي ول .