حنان حبيبزى بي بي سي پښتو ټکى کام،له کابله

	د پاکستان پوځي واکمن په دې مرکه کې هڅه کوله چې د هغو نيوکو ځواب ووايي چې د سياسي گوندونو له خوا په تيره بيا دخلکو د گوند د مشرې بينظير بوټو له خوا وړاندې شوي دي

د بي بي سي د سياسي چارو خبريال برجټ کينډل ته د يوې مرکې په لړ کې نوموړي په پاکستان کې د بيړني حالت له پلي کولو دفاع وکړه.

پوځي واکمن وويل تر هغې چې نوموړى له پوځ سره يوځاى په واک کې وي نو اټومي وسلې به خوندي پاتې وي.

ده د امريکې د حکومت له استازي سره له ليدو کاتو يوه ورځ وړاندې دغه مرکه کوله.

ټاکل شوې ده چې جنرال مشرف نن ((شنبه ١٧ دنومبر)) د امريکا د بهرنيو چارو د وزارت له مرستيال جان نيگرو پونټې سره وگوري چې د پاکستان پر سفر بوخت دى.

دامريکې د حکومت له خوا نيگرو پونټې له هغې وروسته پاکستان ته ورسيده چې پرويز مشرف په پاکستان کې بيړنى حالت اعلان کړ.

جنرال مشرف په دې مرکه کې هڅه کوله چې د هغو نيوکو ځواب ووايي چې د سياسي گوندونو په تيره بيا د پاکستان د خلکو د گوند د مشرې ببينظير بوټو له خوا شوي دي.

پوځي واکمن په دې مرکه کې وويل د جنورۍ په مياشت کې که ټاکنې په خوندي ډول ونشي نو په هيواد کې د تاوتريخوالي د ډيريدو گواښ شته دى.

ده انديښنه وښودله چې په داسې حالاتو کې اټومي وسلې ناسمو لاسو ته ورتلى شي.

مشرف د پاکستان پر پخوانۍ لومړۍ وزيرې تور ولگاوو چې کمزوره سياست پر مخ بيايي او زياته يې کړه چې له ټاکنو پرته هم په هيواد کې تاوتريخوالى ددې د کمزوره سياست له کبله رامنځته کيدى شي.

ښاغلي مشرف پخوانۍ لومړۍ وزيره بينظير بوټو بدنامه او کم ارزښته مشره وبلله .

پوځي واکمن وويل بينظيره ښايي ټول ټاکنې وبايلي او له دې سره به په هيواد کې بنسټپاله عناصر واک ته ورسيږي .

ده ټينگار وکړ چې له دې سره به د پاکستان اټومي ټيکنالوجي هم په خطر کې ولويږي.

ده وويل د پاکستان د خلکو گوند غواړي چې ټول ټاکنې وځنډول شي ، دده په وينا دغه گوندد ټولټاکنو دگټلو په دريځ کې نه دى .

د پاکستان پوځي واکمن ټينگار وکړ چې ټول ټاکنې به پخپل وخت ترسره کيږي او پر لنډمهالې کابينې يې د بينظير بوټو د نيوکو له کبله به د ټاکنو په مهالويش کې هيڅ بدلون رانشي.

مشرف وويل د سياسي گوندونو احتجاجونه به د ټول ټاکنو د ترسره کولو پر هلو ځلو هيڅ ډول ناوړه اغيز ونه کړي.