الياس وحدت په گردېز کې

	په دې وروستيو كې له پكتيا ولايت څخه نژدې هره ورځ د امنيتي پېښو راپورونه وركول كيږي

په لومړۍ پېښه کې د پكتيا ولايت مركز ګردېز ته څېرمه، په غلګۍ نومي سيمه كې، د پوليسو يو موټر په بم الوځول شوى او له امله يې د ځايي چارواكو په خبره دوه پوليس وژل شوي او درې نور ټپيان دي.

د بم چاودنې بله پېښه د پكتيا په ناارامه زرمت ولسوالۍ كې د 'ايس، بي، آى' په نوم هغه خصوصي امنيتي شركت په موټر پسې شوې، چې ايتلافي ځواكونو ته د وړونكو مالونو بدرګه او ساتنه كوي. په دې پېښه كې د نوموړي شركت يو امنيتي كس وژل شوى او دوه نور ژوبل دي.

د پكتيا امنيې قوماندان جنرال عصمت الله عليزي دواړه پېښې تاييد كړې او وايي چې په تور يې تر دې دمه څوك نه دي نيولي.

د سيمې وسله والو طالبانو د يادو دواړو پېښو مسؤوليت پرغاړه اخېستى، خو په دواړو هغو كې د مرګ ژوبلې شمېر د دولتي چارواكو تر تاييد لوړ ښيي.

په دې وروستيو كې له پكتيا ولايت څخه نژدې هره ورځ د امنيتي پېښو راپورونه وركول كيږي او دا په داسې حال كې ده، چې اوس هم د دغه ولايت د ځدراڼو په غرنيو سيمو كې د خيبر په نوم د افغان او ناټو ځواكونو ګډ چاڼيز عمليات روان دي.

بل خوا تېره شپه د خوست په ګربزو ولسوالۍ د سپكو او درنو وسلو بريد شوى او ځايي چارواكي وايي چې يوازې يو سرتېرى پكې ټپي شوى دى.