له وروستيو بريدونو سره د وژل شويو بهرنيو سرتېرو شمېره اتو ته ورسېده

په کابل کې د ناټو ځواکونو يوه خبرپاڼه وايي مرگ ژوبله د افغانستان په سويل ختيځ کې نن (دوشنبه) هغه مهال ور واوښته چې د يوۀ پلۀ جوړونې پروژې په سيمه کې ول.

خبرپاڼه وايي د ناټو سرتېري د پلۀ جوړونې سيمې ته ورغلي ول چې يوۀ سړي خپل ځان والوزاوه او دوه سرتېري يې ځاى پر ځاى ووژل. يوۀ بل سرتېرى روغتون ته پر لارې ساه ورکړه.

د ناټو خبرپاڼې د پېښې په اړه نور جزيات نه دي ورکړي او نه يې د وژل شويو سرتېرو هويت ښوولى.

د نن ورځې له پېښې سربېره، په تېرو دوو ورځو کې هم پنځه بهرني سرتېري د افغانستان په سويل او ختيځ کې په نښتو او بريدونو کې وژل شوي دي.
سږ کال د بريدونو په ترڅ کې د وژل شويو بهرنيو سرتېرو شمېره په افغانستان کې تر ١٥٠اوړي. ډېرى دغه سرتېري په سويل او ختيځ کې وژل شوي دي.