په وروستيو مياشتو کې د افغانستان په سويل او ختيځ کې پر ناټو ځواکونو بريدونه زيات شوي

دا شپږ سره تېره ورځ د هېواد په سويل او ختيځ کې وژل شوي دي.

د ناټو ځواکونو يوه خبرپاڼه وايي د دوى څلور سرتېري هغه مهال په ختيځ کې ووژل شول چې د دوى گاډى د سړک د غاړې پر بم وخوت.

همدارنگه په ختيځ کې يو بل سرتېرى په جلا پېښه کې وژل شوى. د ناټو ځواکونو خبرپاڼه وايي شپږم سرتېرى په سويل کې په يوه پېښه کې وژل شوى.

د دغو پېښو دقيقې سيمې نه دي ښوول شوې. خبرپاڼې دا هم نه دي ويلي چې وژل شوي سرتېري د کوم هېواد دي.

ناټو په افغانستان کې شاوخوا تر ٣٧٠٠٠ زيات سرتېري لري چې له ٣٧هېوادونو څخه جوړ دي.

پر دغو ځواکونو باندې د افغانستان په سويل او ختيځ کې په وروستيو مياشتو کې بريدونه زيات شوي، چې وسله وال طالبان يې زياتره تر شا وي.

تېره ورځ هم په ختيځ ولايت کونړ کې د ناټو يو سرتېرى د وسله والو طالبانو په کمين کې وژل شوى و.