محمد يونس برهان په کابل کې

	دواړه مشران په داسې مهال کې سره گوري چې په افغانستان کې روان حالات په بېلابېلو برخو کې ترينگلي ښکاري

ولسمشر کرزى به په کمپ ډيويډ ارامځاى کې له خپل امريکايي سيال، جورج ډبليو بوش، سره د اگست په پنځمه او شپږمه وگوري.

له سپينې ماڼۍ څخه په يوې خپرې شوې خبرپاڼه کې ويل شوي چې دواړه مشران به د افغانستان د اوږدمهالې ولسواکۍ، هوساينې او امنيت په اړه پر خپلو گډو هڅو غور وکړي.

دغه خبرې به پر هغه څه راټولې وي چې دوه کاله مخکې د گډې ستراتيژيکې ملگرتيا په اعلاميه کې پرې هوکړه شوې وه.

خبرپاڼه وايي دواړه مشران به د افغانستان د ملي پرمختگ پر ستراتيژي، په افغان حکومت کې پر فساد ضد مبارزې، د عدالت په برخه کې پر پرمختگونو او اقتصادي پرمختياوو بحث وکړي.

په ترهگرۍ ضد جگړه کې د دوو لوريو همکاري، د نشه يي توکو په وړاندې هلې ځلې او له گاونډيو هېوادونو سره اړيکې به د افغان او امريکايي مشرانو د خبرو له نورو موضوعاتو څخه وي.

دواړه مشران به د افغانستان د پرمختياوو په اړه په داسې مهال کې سره وگوري چې په هېواد کې روان حالات په بېلابېلو برخو کې ترينگلي ښکاري.

په تېر سپتمبر کې امريکا ته د ولسمشر کرزي د وروستي سفر، تر ټولو غټه لاسته راوړنه د امن د جرگې پر جوړولو د افغان او پاکستاني حکومتونو هوکړه وه. اوسنى سفر، د دغې جرگې په درشل کې کېږي.

له دې سربېره، د افغان حکومت او امريکايي ادارې لپاره د پام وړ خبره له گاونډيو هېوادونو، په تېره بيا له پاکستان سره، د اړيکو مساله ده.

امريکا ته د ولسمشر کرزي د وروستي سفر، چې په تېر سپتمبر کې و، تر ټولو غټه لاسته راوړنه د امن د جرگې پر جوړولو د افغان او پاکستاني حکومتونو هوکړه وه. اوسنى سفر، د دغې جرگې په درشل کې کېږي.

د جرگې موخه د دوو گاونډيو هېوادونو په گډه همکارۍ په سيمه کې د امنيت ټينگول او د شته دپلوماتيکې ترينگلتيا کمول ښوول شوي دي.

په داسې حال کې چې خبريالان وايي د امن جرگې د پايلو په اړه هيلې ترپخوا پيکه شوې، معلومه نه ده چې افغان او امريکايي مشران به دا ځلې په سيمه کې د ټيکاو په اړه څه نوي وړانديزونه ولري که نه.