عبدالمالک عاصم له کابله

	د ښاغلي کرزي له دې خبرو داسې ښکاري چې دا ځل غواړي د جورج بوش په وړاندې له جنرال مشرف څخهژمنې ترې واخلې

ويل کېږي چې په نژدې راتلونکې کې به په واشنگټن کې ولسمشران بوش ، پرويزمشرف او حامد کرزى دافغانستان پر امنيتي وضيعت گډې او دترهگرۍ پر ضد دروانې جگړې پر سر خبرې وکړي .

تردې وړاندې په کابل کې افغان او پاکستاني مشرانو د ترهگرۍ پر وړاندې جگړه کې يوه او بل ته لاسونه ورکړل .

ښاغلي کرزي يوه خبري کنفرانس ته وويل چې متحدو ايالتونو ته له يوې روښانه اجنډا سره تلونکي دي .

(( په روښانه دريځ واشنگټن ته ځو او په روښانه ټکو کې به له پاکستان او جنرال مشرف نه وغواړو چې له افغانستان او نړى سره د تر هگرۍ پر ضد مبارزه کې مرسته وکړي ))

ورته غوښتنې په تېر وخت کې هم شوي خو د ښاغلي کرزي له دې خبرو داسې ښکاري چې دا ځل غواړي د جورج بوش په وړاندې ژمنې ترې واخلې .ممکن بله انگېرنه ترې داوي چې اسلام اباد هغه ډول مرسته نه کوي چې کابل يې هېله لري .

څه موده وړاندې په کابل کې جنرال مشر ف ژمنه وکړه چې دترهگرو ،ورانکارو او طالب وسله والو په مخنيوي کي به افغان دولت سره مرسته کوي .

افغان ولسمشر د پرويز مشرف هغوه خبرو ته هم ځواب ورکړچې طالبان له القاعدې نه ډېر خطر ناک دي .

خو دا خبره يې په کلکه رد کړه چې دوسله والو طالبانو اډې په افغانستان کې دي .

داچې د ا ترهگر په افغانستان کې دي او اډه يې دلته ده دا په کلکه ردوم او د پښتنو په گډون دافغانستان د هېڅ قوم استازيتوب نه کوي ولسمشر کرزى

(( هر هغه څوک چې په خلکو کې ويره واچوي . عام وگړي ووژني او ورانکاري وکړي ترهگر دي دا که طالبا ن وي او که القاعده . دا که طالبان وي او که بل هرڅوک زه فکر کوم ټول ترهگرټولو ته خطرناک دي . او داچې د ا ترهگر په افغانستان کې دي او اډه يې دلته ده دا په کلکه ردوم او د پښتنو په گډون دافغانستان د هېڅ قوم استازيتوب نه کوي . ))

جنرال مشرف د بلجېم په پلازمينه بروکسلز کې ويلي وو چې طالبان تر القاعدې خطرناک او د پښتنو په مينځ کې رېښې لري.

ښاغلي کرزي عادي طالبان چې جرم يې نه وي کړى ددې خاورې بچيان وبلل او ويې ويل چې ددوى غېږه ورته پرانېستې ده .

امريکي ته دافغان او پاکستاني ولسمشرانو سفر ډېر مهم بلل کيږي . او افغان چارواکي هېله من دي چې دا سفر به دافغانستان په امنيت کې مرسته وکړي .

دا وروستۍ څرگندونې داسې ښيي چې لاهم دترهگر ۍ پر وړاندې مبارزه کې دافغانستان او پاکستان تر مينځ شکونه مو جود دي .