طالبان: کابل کې د داعش ضد عملیاتو کې ددې ډلې شپږ تنه وژل شوي
د عکس سرچینه، Getty Images
د طالبانو ویاند ذبیح الله مجاهد وايي، تېره شپه د دوی ځواکونو کابل کې عملیات کړي، د داعش ډلې شپږ کسان یې وژلي او دوه یې ژوندي نیولي دي.
د طالبانو په اعلامیه کې ادعا شوې چې د داعش ډلې دا وسله وال هغه کسان وو، چې د اعلامیې په ټکیو د وزیر اکبر خان مېنې جومات او کاج روزنیز مرکز په چاودنو کې یې لاس درلود.
له دې مخکې رپوټونو کې ویل شوي وو، د ښار ختیځه څنډه کې څو چاودنې شوې دي.
د سیمې خلکو ویلي وو چې له دغو چاودنو وروسته د سپکو او درنو وسلو دوامدار غږونه یې هم اورېدلي دي.
په خواله رسنیو کې هم سیمه کې د جګړې او ډزو یوه ویډیو خپره شوې ده.
د طالبانو ویاند ذبیح الله مجاهد تېر ماښام په یوه ټویټر پیغام کې لیکلي و چې په خبره یې هلته د ''خوارجو '' پر ضد د دوی عملیاتروان دي او ښاریان دې اندېښنه نه کوي.
دې لیکنه کې له social media راخیستل شوي مواد شته. له ښودلو وړاندې یې ستاسې اجازه پکار ده، ځکه ښایيکوکیز یا بله تکنالوژي پکې کارول شوې وي. کولی شئ له اجازې مخکې د social media site پالیسي ولولئ. د دې لپاره غوښتنه ومنئ او مخکې لاړ شئ
د پوسټ X پای
که څه هم طالبانو رسماً په دې عملیاتو کې د خپلې مرګ ژوبلې په اړه څه نه دي ویلي، خو طالبانو ته نژدې یوې سرچینې پر ټویټر د یوه طالب جنګیالي عکس خپور کړی او وايي چې د تېرې شپې عملیاتو کې وژل شوی.
طالبان د خوارجو کلمه د اسلامي دولت نومې ډلې 'داعش ' ته کاروي چې په دا وروستیو کې یې د کابل په لوېدیځه برخه کې پر شیعه لږکیو یوشمېر خونړي بریدونه کړي دي.
ښاغلی مجاهد وايي، عملیات د کابل ښار په اتمه ناحیه سیمه کې شوي دي.
د کابل ښار لویدیځه برخه کې یو وروستی خونړی برید د کاج په نامه پر یوه روزنیز مرکز وشو، چې لسګونه زدکوونکې په کې ووژل شول او ترسلو ډېر نور په کې ژوبل شول.
د هغه برید مسوولیت تر اوسه کومې ډلې نه دی منلی.
