د طالبانو مشر ۱۳ حکومتي څوکیو کې تازه ګومارنې کړې
د عکس سرچینه، Taliban
په افغانستان کې د طالبان حکومت وايي، مشر یې شیخ هبت الله اخندزاده په بېلا بېلو ولایتونو او ادارو کې ۱۳ نوې کسان ګومارلي دي.
د طالبانو حکومت ویاند ذبیح الله مجاهد پر خپله ټوېټر پاڼه د دغو ګمارنو اعلان کړی.
په تازه ګومارنو کې د اوو ولایتونو خوست، بلخ، زابل، بدخشان، سمنګان، فاریاب او جوزجان والیان نوي شوي دي.
د زابل اوسنی والي ملا بسم الله اخند د خوست والي په توګه ټاکل شوی او د خوست والي مولوي محمد نبي عمري بیا د کورنیو چارو وزارت لومړی مرستیال ګومارل شوی دی.
د کورنیو چارو وزارت لومړی مرستیال ملا محمد داود مزمل بیا د بلخ والي مقرر شوی دی. د بلخ اوسنی والي مولوي قدرت الله ابو حمزه بیا زابل ولایت ته تبدیل شوی.
دې لیکنه کې له social media راخیستل شوي مواد شته. له ښودلو وړاندې یې ستاسې اجازه پکار ده، ځکه ښایيکوکیز یا بله تکنالوژي پکې کارول شوې وي. کولی شئ له اجازې مخکې د social media site پالیسي ولولئ. د دې لپاره غوښتنه ومنئ او مخکې لاړ شئ
د پوسټ X پای
طالبانو د یو شمېر ولایتونو لپاره پوځي کسان هم ټاکلي دي. په دغه لړ کې شمالي ولایت بدخشان ته د ستر درستیزۍ د هوايي قومندانۍ قومندان مولوي امان الدین منصور والي ټاکل شوی دی.
د بدخشان اوسنی والي مولوي عبدالغني بیا د عدلیې وزارت د اداري او مالي مرستیال مقرر شوی.
دغه راز د هلمند امنیه قومندان ملا عبدالاحد فضلي د سمنګان والي شوی.
د جوزجان فعلي امنیه قومندان قاري محمد اسماعیل راسخ د همدې ولایت والي شوی.
د جوزجان والي ملا محمد شعیب رسالت بیا فاریاب ولایت ته تبدیل شوی.
پر طالبانو نېوکه دا کېږي چې په حکومت کې یې له یوې مخې د خپلې ډلې کسان ګومارلي دي.
ځینې دا هم وايي چې په مهمو مسلکي او تخنیکي څوکیو یې د خپلې ډلې داسې کسان ګومارلي چې وړتیا یې نه لري.
