تاسې د وېبسایټ داسې بڼه ګورئ چې یوازې متن لري او لږ انټرنېټ کاروي. که غواړئ عکسونه او ویډیوګانې وګورئ، نو د وېبسایټ اصلي (لومړنۍ) بڼې ته ورشئ.
د وېبسایټ اصلي بڼې ته مې وروله
د وېبسایټ دې بڼې په اړه چې ډېر انټرنېټ نه مصرفوي نور معلومات دلته موندلای شئ.
ترکیه ۳۶۳ نور افغان پنا غوښتونکي بېرته افغانستان ته استوي
ترکي رسنۍ وايي، دغه هېواد ۳۶۳ نور هغه افغان پنا غوښتونکي افغانستان ته بېرته استوي، چې د اروپا په تکل یې تر ترکیې ځانونه رسولي وو.
د ترکیې دولتي خبري اژانس "اناتولي" د ترکي چارواکو له خولې ویلي، دغه افغانان په "ناقانونه" توګه ترکیې ته راغلي دي.
په وروستیو میاشتو کې ترکیې د قانوني اسنادو نه لرونکو کسانو پر وړاندې خپله تګلاره سخته کړې ده او د هغوی د څرک مالومول او نیول یې پیل کړي دي.
اناتولي خبري اژانس وايي، هغه افغانان چې قانوني اسناد نه لري د افغانستان له لوېدیځې پولې استانبول ته رسېدلي دي چې ژر به کابل ته بېرته ستانه کړل شي.
له تېرو څو کلونو راهیسې د ایران له لارې ترکیې ته د افغانانو د ناقانونه تلو لړۍ روانه وه.
په ترکیه کې ځینو مېشتو افغانانو بي بي سي ته ویلي، د ترکیې دولت وروسته تر هغه د کډوالو سخت سیاست غوره کړ، چې سیاسي مخالفانو یې نیوکه پرې وکړه.
په تېرو څو ورځو کې له پناغوښتونکو کډوالو سره د ترکي پولیسو د ناسم چلن وېډیوګانې لاس په لاس شوې دي.
په وروستیو کې، سلګونه افغان پناغوښتونکي په ترکیه کې نیول شوي او افغانستان ته ستانه کړل شوي دي.
تېرې څو میاشتې د ایران شمال لوېدیځې سرحدي سیمې د افغان پناغوښتونکو د ورماتېدو شاهدانې وې.
دوی هڅه کوي ځانونه ترکیې ته ورسوي، خو ډېری یې د ایران سرحدي پولیس نیسي.
د تېرې جون وروستیو کې ترکیې وویل، ترکي پولیسو ۱۳۱ افغان کډوال کابل ته ستانه کړي. دا کسان له استانبول نه کابل ته په یوه عادي الوتنه کې لېږدول شوي.
د اناتولي د خبر پربنسټ: "د روان کال له پیله تر ۳۷ زرو ډېر هغه کډوال او پنا غوښتونکي افغانستان ته ستنول شوي چې په ترکیه کې یې د اوسېدو قانوني اسناد نه لرل، چې دا د تېر کال پرتله ۸۹ سلنه ډېروالی ښيي".
له هغې راهیسې چې طالبان پر افغانستان واکمن شوې دي، له دغه هېواده د خلکو په ځانګړي ډول د ځوانانو د وتو کچه په کمسارې ډول لوړه شوې ده.
اروپا ته پر مرګونو لارو سفرونه له لویه سره په افغانستان کې د روزګار د نشتوالي له امله کېږي او ځینې یې له وېرې هم له وطن وځي.
