د انتالیا دیپلوماسۍ فورم؛ امریکا له خپلو مهمو نړیوالو متحدانو سره پر افغانستان غږېږي
د عکس سرچینه، Getty Images
د افغانستان لپاره د امریکا د سفارت شارژدافیر ایان مککري چې اوس د قطر له پلازمېنې دوحې فعالیت کوي وايي، د افغانستان له خلکو سره د دوی ژمنتیا پیاوړې ده او دا چې د دې ژمنتیا پر ځای کولو لپاره له هر ممکن فرصته ګټه اخلي.
هغه دا څرګندونې ترکیه کې د 'انتالیا دیپلوماسۍ فورم' د پرانیستې درشل کې پر خپل ټویټر کړې.
دې غونډه کې د نوموړي تر څنګ افغانستان لپاره د امریکا ځانګړي استازي توماس وېسټ هم برخه اخیستې.
ښاغلي وېسټ هم د دې مهمې نړیوالې غونډې کوربتوب له کبله د انقرې مننه کړې او ویلي یې دي چې له خپلو "مهمو شریکانو سره به افغانستان سره د نړیوال تعامل په اړه خبرې" وکړي.
دې لیکنه کې له social media راخیستل شوي مواد شته. له ښودلو وړاندې یې ستاسې اجازه پکار ده، ځکه ښایيکوکیز یا بله تکنالوژي پکې کارول شوې وي. کولی شئ له اجازې مخکې د social media site پالیسي ولولئ. د دې لپاره غوښتنه ومنئ او مخکې لاړ شئ
د پوسټ X پای
د انتالیا ديپلوماسۍ فورم د مارچ له ۱۱مې تر ۱۳مې دوام کوي او د طالبانو د حکومت بهرنیو چارو وزیر امیر خان متقي ته هم پکې د ګډون بلنه ورکړ شوې ده.
د غونډې ته د نړۍ د بېلابېلو هېوادونو او سازمانونو شاوخوا ۲۰۰۰ استازي، سیاسیون، دیپلوماتان او پالیسي جوړوونکي وربلل شوي.
ګډونوال د لوړې کچې دې درې ورځنۍ ناسته کې د پالیسۍ، دیپلوماسۍ او سوداګرۍ په اړه لیدلوري شریکوي.
د طالبانو بهرنیو چارو وزارت تېره ورځ په یوه اعلامیه کې وویل ښاغلی متقي به د انتالیا دیپلوماسۍ فورم ته د وینا ترڅنګ د ترکیې او ځینو نورو هېوادونو له چاوراکو سره وګوري.
تر اوسه د ترکیې په ګډون د نړۍ یوه هېواد هم د طالبانو حکومت په رسمیت نه دی پېژندلی، خو د ترکیې سفیر کابل کې دی او وخت ناوخت له طالب چارواکو او نورو افغان مشرانو سره ګوري.
د طالبانو بهرنیو چارو وزیر امیر خان متقي څو میاشتې وړاندې هم انقرې ته تللی او د ترکیې له بهرنیو چارو وزیر سره یې د افغانستان پر مسایلو خبرې کړې وې.
