تاسې د وېبسایټ داسې بڼه ګورئ چې یوازې متن لري او لږ انټرنېټ کاروي. که غواړئ عکسونه او ویډیوګانې وګورئ، نو د وېبسایټ اصلي (لومړنۍ) بڼې ته ورشئ.
د وېبسایټ اصلي بڼې ته مې وروله
د وېبسایټ دې بڼې په اړه چې ډېر انټرنېټ نه مصرفوي نور معلومات دلته موندلای شئ.
طالبان: افغانستان ته د ازبکستان وارداتي برېښنا لېږد کې رامنځته شوې ''تخنيکي ستونزه'' حل شوې
د افغانستان ملي برېښنا شرکت وايي، له ازبکستانه افغانستان ته د وارداتي برېښنا لېږد کې د تخنیکي ستونزې له کبله راغلی کموالی ختم شوی دی.
د برېښنا شرکت دوې ورځې مخکې ویلي، و له ازبکستانه د افغانستان لپاره د وارداتی برېښنا لېږد کې شپیته سلنه کموالی راغلی و، چې اوس دا ستونزه هواره شوې او برېښنا عادي حالت ته ګرځېدلې.
د برېښنا ریاست ویاند حکمت الله میوندوال وايي، ستونزه د ازبکستان په ''مرجان '' برېښناکوټ کې رامنځته شوې وه، چې اوس حل شوې او افغانستان له ازبکستان سره د شوي قرارداد له مخې بشپړه برېښنا ترلاسه کوي.
د طالبانو ویاند ذبیح الله مجاهد پر ټویټر پاڼه په دې تړاو د ازبکستان چارواکو مننه کړې ده.
افغانستان د خپلو برېښنايي ستونځو د اوارولو لپاره له ایران، ازبکستان، تاجکستان او ترکمنستان برېښنا واردوي.
د افغانستان ۷۷ سلنه برېښنا له ازبکستان، ترکمنستان، تاجکستان او ایران واردېږي.
افغانستان کې تولیدي برېښنا نږدې ۱۹ سلنه د دغه هېواد اړتیا پوره کوي، چې څلور سلنه له حرارتي او نوېدونکې انرژۍ او پاتې له اوبو تولېدي.
