د کابل اسعارو بازار کې د امریکایي ډالر بیه راټیټه شوې
د عکس سرچینه، AFP
د افغانستان د اسعارو د راکړې ورکړې تر ټولو لوی بازار سرای شهزاده کې د پنجشنبې پر ورځ د افغانیو پر وړاندې د امریکایي ډالر بیه یو څه راټیټه شوه.
پنجشنبه سهار د افغانستان ملي تلویزین، طلوع نیوز او ګڼو نورو ځایي رسنیو راپوړ ورکړ چې سرای شهزاده کې یو ډالر په ۹۴ افغانۍ پلورل کېږي.
خو د سرای شهزاد د صرافانو د ټولنې غړي حاجي عبدالرحمن څيرک بي بي سي ته ویلي چې د ډالر بیه له ۱۰۱ نه نیولې تر ۱۰۳ افغانیو پورې ده.
تېرو ورځو کې د افغانۍ پر وړاندې د ډالر بیه رېکارډ کچې ته پورته شوې وه او ورسره په افغانستان کې د اقتصادي وضعیت لا خرابېدو وېره پیدا شوه.
بل لور د طالبانو د ویاند مرستیال احمدالله وثیق د افغانستان بانک چارواکو له قوله وايي، د یاد بانک له لوري پرون چهارشنبه د افغانستان نړیوال بانک اې ای بي ته ۱۹ اعشاریه دوه میلیونه ډالر نغد ورکړل شوي دي.
دې لیکنه کې له social media راخیستل شوي مواد شته. له ښودلو وړاندې یې ستاسې اجازه پکار ده، ځکه ښایيکوکیز یا بله تکنالوژي پکې کارول شوې وي. کولی شئ له اجازې مخکې د social media site پالیسي ولولئ. د دې لپاره غوښتنه ومنئ او مخکې لاړ شئ
د پوسټ X پای
طالبانو د بهرنيو اسعارو پر وړاندې د افغاني په ارزښت کې د ثبات راوستلو لپاره افغانستان کې ټولو سوداګریزو راکړو ورکړو او په بازارونو کې د بهرنیو پیسو لکه پاکستانۍ کلدارو او ایراني تومانو پر کارېدا بندیز ولګاوه.
طالبان وايي همد راز یې د ډالرو قاچاق کوونکو ته هم سخته سزا په پام کې نیولې.
په افغانستان کې د طالبانو حکومت رئیس الوزرا مرستیال عبدالسلام حنفي وايي، د نغدو ډالرو په ګډون د یو شمېر توکو قاچاق سخت منع دی او که څوک د دې قاچاق په تړاو ونیول شي، سخته سزا به وویني.
د یادونې ده چې تېره اونۍ امریکا د افغانستان د کنګل شوې شتمنۍ د ورسپارنې په تړاو د طالبانو غوښتنه بیا رد کړه.
له دې مخکې د طالبانو د حکومت د بهرنیو چارو وزیر امیر خان متقي له ایسوشیټیډ پریس خبري اژانس سره مرکه کې پر امریکا بیا غږ وکړ، چې کابو لس میلیارده ډالر افغان شتمني ور پرېږدي.
خو د ښاغلي متقي له دې څرګندونو وروسته د سپینې ماڼۍ ویاندې جین ساکي په دې هکله خبریالانو ته وویل، ''دا یو پېچلی بهیر دی او امریکا به له غور سره ګام پورته کوي. ''
