فاریاب کې د نوي والي له بدلېدو وروسته هم احتجاجونه دوام لري
د افغانستان شمالي فاریاب ته د نوي سرپرست والي تر ټاکل کېدا یوه ورځ وروسته هم ددغه ولایت په مرکز میمنه ښار کې احتجاجونه دوام لري.
د اعتراض کوونکو یو مشر احسان الله قوانچ بي بي سي ته وویل حکومت باید د دغو اعتراض کوونکو غوښتنو ته پاملرنه وکړي او د فاریاب لپاره دې هغه کس والي وټاکي، چې د دغه ولایت خلک یې غواړي.
نوموړي وويل کوم نوی مرستیال والي چې سرپرست ټاکل شوی ورته احترام لري، خو غواړي چې نوی والي باید معرفي شي.
د تېرو ورځو په څېر په میمنه کې لا هم دولتي اداري تړل شوي.
په میمنې ښار کې لاریون کوونکو د اسلامي جنبش ګوند د مشر مارشال عبد الرشید دوستم پر پلوۍ شعارونه ورکول. فاریاب یو له هغو ولایتونو دی چې ښاغلی دوستم په کې ډېر نفوذ لري.
د جنبش ګوند ویاند احسان نیرو بي بي سي ته وویل چې د وروستۍ پرېکړې لپاره د فاریاب د اعتراض کوونکو استازي له دوستم سره په مشوره کې دي.
خو هغه وویل کابل ته د "ښاغلي لغماني ستنول د اعتراض کوونکو غوښتنه وه" او دوی د سیمه ییزو ارګاونو ا دارې له خوا د نوي چارسمبالي والي هر کلی کوي.
فاریاب لپاره نوی سرپرست والي
د افغانستان د سيمه ييزو ارګانونو خپلواکه اداره وايي، د فاریاب مالي او اداري مرستيال د دغه ولایت د سرپرست والي په توګه وټاکل شو.
د دې ادارې دا خبره په داسې مهال ده چې د فاریاب لپاره د افغان حکومت د ټاکلي والي داود لغماني په مقابل کې له څو اونیو راهیسې د مارشال عبدالرشید دوستم پلویانو مظاهرې روانې وې.
اوس د سیمه ییزو ارګانونو اداره خپل فیسبوک کې لیکي: "د فارياب درنو ولسونو په غوښتنه او د ستونزو د حل په موخه؛ د دې ولايت مالي او اداري مرستيال ښاغلی عبدالمقيم راسخ د عبدالباقي زوی د فارياب ولايت د چارو د سرپرستۍ لپاره توظيف کړل شو."
د عکس سرچینه، F P
د فاریاب لپاره د والي ګومارلو پر سر هغه مهال جنجال پیل شو چې د افغانستان سيمه ييزو ارګانونو خپلواکې ادارې نږدې میاشت مخکې داود لغمانی دغه ولایت ته وګوماره.
د نوي والي د مخالفت لپاره فاریاب او ور څېرمه ولایتونو بلخ او جوزجان کې هم مظاهرې وشوې، چې د ملي جنبش ګوند نفوذ پکې دی.
د احتجاج کوونکو لویه غوښتنه دا وه چې د والي په ټاکلو یا ګومارنه کې دې له دوی، یانې له ځایي خلکو سره سلا مشوره وشي.
تېره اونۍ چې داود لغمانی د فاریاب یوه پوځي اډه کې د والي په توګه معرفي شو په مقابل کې یې پرلت هم وشو او لاریونوالو ویل چې غوښتنه یې منل شوې نه وي، خپل احتجاج به جاري ساتي.
د مارشال دوستم په مشرۍ د ملي جنبش ګوند دغو پلویانو د یکشنبې په ورځ د نوي والي د ګومارلو لپاره "د رایو صندوق" هم کېښود او ویې ویل "د مختلفو پاړکو استازي" دغو "ټاکنو" کې د نوي والي په توګه پرېکړه کوي.
ځینې سرچینو په هغه ورځ بي بي سي ته وویل، چې د معترضانو ډله کې ۱۴ کسان غوره شول چې نوی والي وټاکي، خو دغو کسانو هم رایه ور کړه چې نو والي باید د مارشال دوستم له خوا "وټاکل" شي.
