طالبانو سره د "لومړي تماس" حکومتي پلاوی کابل ته ستون شو

هغه پلاوی چې افغان حکومت له طالبانو سره د لومړي تماس ټینګولو په موخه قطر ته استولی و، له شاوخوا دوه اوونیو تېرولو وروسته کابل ته ستون شوی.

د افغانستان د ملي امنیت شورا له خوا نن پنجشنبه ( ۱۲ مارچ) په خپاره شوي بیان کې ویل شوي چې دا پلاوی د قطر په وړاندیز او له امریکا سره د تفاهم پر بنسټ دغه هېواد ته استول شوی و.

د ملي امنیت شورا بیان کې له طالبانو سره د دې پلاوي د لیدنې په اړه څه نه دي ویل شوي. خو زیاتوي چې دې پلاوي د امریکا، قطر، ناروې اندونیزیا او جرمني له چارواکو سره لیدلي دي.

بیان زیاتوي چې د ولسمشر محمد اشرف غني د تازه فرمان د ښه تطبیق لپاره چې د طالب زندانیانو د خوشې کولو او عفوې په تړاو صادر شوی، د افغان حکومت یو بل پلاوی به دوحې ته سفر وکړي. خو د سفر نېټه یې نه ده یاده شوې.

د لومړي تماس په موخه په تېر پلاوي کې د سولې د وزارت مرستیال عبدالخالق بالاکرزی، د ملي امنیت شورا مرستیال سلیم شاه ابراهیمي، په اندونیزیا کې د افغانستان سفیر فیض الله ذکي، د عدلیې وزارت مرستیاله مېرمن زکیه عادلي، د حج او اوقافو وزارت مرستیال مولوي مظفري او د محابسو د تنظیم ادارې مشر ښاغلی توتاخېل شامل وو.

د وسله والو طالبانو ویاند ذبیح الله مجاهد بي بي سي ته ویلي وو چې دا پلاوی د طالبانو لخوا قطر ته نه دی ورغوښتل شوی او دوی به ورسره هېڅ ډول خبرې هم نه کوي.

خو وورسته طالبانو وویل چې یوازې د زندانونو له چارواکو سره به د زندانیانو د تبادلې په تړاو لیده کاته وکړي.