تاسې د وېبسایټ داسې بڼه ګورئ چې یوازې متن لري او لږ انټرنېټ کاروي. که غواړئ عکسونه او ویډیوګانې وګورئ، نو د وېبسایټ اصلي (لومړنۍ) بڼې ته ورشئ.
د وېبسایټ اصلي بڼې ته مې وروله
د وېبسایټ دې بڼې په اړه چې ډېر انټرنېټ نه مصرفوي نور معلومات دلته موندلای شئ.
غني اجرائیه ریاست لغوه کړ؛ خو عبدالله وایي "غني نور ولسمشر نه دی"
د افغانستان ولسمشر محمد اشرف غني د یوه فرمان له مخې اجراییه ریاست لغوه کړی دی. په دې فرمان کې ویل شوي، د اجراییه ریاست کاري دوره پای ته رسېدلې ده.
د افغانستان د ولسمشرۍ ماڼۍ ویاند صدیق صدیقي نن د چارشنبې په ورځ په یوه خبري غونډه کې وويل "کله چې د ولسمشر غني له لوري د لوړې مراسم ترسره شول نور اجراییه ریاست نشته."
نوموړي زیاته کړه چې د افغان حکومت په چوکاټ کې د دې ریاست ځای نشته.
خو د ولسمشر غني له دې فرمانه یوازې څو ساعته وروسته عبدالله عبدالله د يوې اعلاميې په خپرولو وویل، چې محمد اشرف غني نور ولسمشر نه دى، فرمانونه او حکمونه يې نو اعتبار نه لري.
د ولسمشر غني فرمان:
د ولسمشرغني پنځه ماده ییز فرمان کې چې بي بي سي ترلاسه کړې هم ویل شوي چې د اجرائیه ریاست کاري دوره پای ته رسېدلې.
په خپاره شوي فرمان کې راغلي چې د اجرائيه رياست د جوړېدو او د وزيرانو د شورا په تړاو ټول صادر شوي فرمانونه او حکمونه، د ملي وحدت د حکومت پخواني اجرائيه رئيس ته ورکړل شوي ځينې واکونه، لگښتونه او امتيازات د ١٣٩٨ کال د حوت مياشتې له ١٩ نېټې د اعتبار وړ نه دي او لغوه دي.
دغه حکم کې همداراز ټولو دولتي ادارو ته لارښوونه شوې چې د پخواني اجرائيه رياست او وزيرانو شورا د دارالانشا په نامه د اسنادو او ليکونو له تر لاسه کولو او په تړاو يې له اجراتو ډډه وکړي.
د اجرائیه ریاست کارکوونکو برخليک:
د ولسمشرۍ د فرمان دريمه ماده کې د اجرائيه رياست او وزيرانو د شورا د دارالانشا د کارمنو د برخليک په اړه ويل شوي چې د انتظار په حالت کې به وي او نورو ادارو کې يې د گومارنې د زمينې برابرېدو پورې به تنخوا ورکول کېږي.
د عبدالله سملاسي غبرګون:
خو د ښاغلي عبدالله اعلاميه چې برېښي د اجراييه رياست د لغوه کېدا په تړاو د ولسمشر غني فرمان ته غبرگون دى وايي "د افغانستان د اسلامي جمهوريت د "ټولشمول" ولسمشر په توگه د لوړې کولو وروسته ملي وحدت حکومت عملا" ختم شوى او ژر به د ټولشمول دولت اجراييه رييس د يوۀ فرمان په ترڅ کې ور وپېژندل شي.
ښاغلي عبدالله د پخواني اجراييه رياست ملکي او پوځي کارکوونکو ته لارښوونه کړې چې لکه پخوا خپلې ورځنۍ چارې جاري وساتي.
د مخورو د خونديتوب موضوع:
د ولسمشر غني تازه خپور شوى فرمان وايي د "پخواني" اجراييه رياست او د وزيرانو شورا د کارکوونکو امنيت ساتنې لپاره د گومارل شويو دولتي ساتونکو دنده پاى ته رسېدلې.
دفاع او د کورنيو چارو وزارتونو او نورو اړوندو امنيتي ادارو ته لارښوونه شوې چې دې برخه کې خپل گومارلي کسان بېرته ور وغواړي.
فرمان کې راغلي چې د مخورو دولتي وگړو د ساتنې رياست به دريو ورځو لپاره د ښاغلي عبدالله د خونديتابه څرنگوالى ارزوي او خپل وړانديزونه به د منظورۍ لپاره ولسمشر ته استوي.
د اجراييه رياست او د ملي وحدت حکومت د لغوه کېدو دا خبره دوه ورځې وروسته له هغه مخې ته راځي چې ولسمشر غني دويم ځل لپاره د افغانستان د ولسمشر په توگه لوړه وکړه.
د هغه سيال عبدالله عبدالله د ټاکنو د خپلواک کمېسيون له لوري د ولسمشر غني د بري اعلان ونه مانه، ځان يې بريالى اعلان کړ او ښاغلي غني سره يې هممهاله د خپلې لوړې مراسم ترسره کړل.
یاده دې وي چې ولسمشر محمد اشرف غني ان د خپل ټاکنیز کمپاین په ورځو کې ژمنه کړې وه چې که ټاکنې وګټي نو اجرايیه ریاست به له منځه وړي.
