خوست کې ماین چاودنې جنازې ته روان ولسي وګړي وژلي
د عکس سرچینه، NASRAT RAHIMI
د افغانستان د کورنیو چارو وزارت وايي، سوېل ختیځ خوست ولایت علیشېر ولسوالۍ کې د "طالبانو" یوه ماین چاودنې لږترلږه لس ولسي وګړي وژلي.
د دغه وزارت ویاند نصرت رحیمي پر خپله فېسبوکپاڼه لیکلي، چاودنه د سې شنبې په ګهیځ شاوخوا پنځه بجې د علیشېر ولسوالۍ په "بخانه" سیمه کې شوې ده.
خوست کې د پولیسو ویاند عادل حیدر وايي، سهار وختي یو سراچه موټر د ښار پر لور روان و، چې د سړک غاړې پر ماین وربرابر شو او په کې سپاره ټول کسان وژل ووژل شول.
عادل حیدر وايي، پېښه کې پنځه سړي، دوه ښځې او درې ماشومان وژل شوي دي.
د علیشېر ولسوال مجیب الرحمن سلیم زوی وايي، پېښه د کوزې ابوخانې اړوند سیمه کې رامنځته شوې. د سیمې خلک وايي، وژل شوي کسان د بابرک ټانې کوچیان وو چې ښار ته پر لاره وو.
د سیمې یو اوسېدونکی جاوېد چې د سهار لمانځه پرمهال له کوره راوتلی و، وايي دوه موټر روان وو چې پر یوه یې چاودنه وشوه:
"د ماشومانو جسدونه مې ولیدل، خو ورنژدې نه شوم، ځکه خپله د زړه بېماري لرم او دومره زور را کې نه و چې په وینو لت پت جسدونه ووینم."
همدغه عیني شاهد وايي، وژل شوي خلک لوګر ته د خپلوانو جنازې لپاره روان وو چې خپله په جنازو بدل شول.
تر اوسه د یادې پېښې په اړه وسلوالو ډلو څه نه دي ویلي.
بل خوا، نن سهار د مزارشریف الکوزي څلورلارې ته څېرمه د دویمې حوزې تر څنګ د ترافیکو له موټر سره پر یوه بایسکل ځای پر ځای شوي چاودېدونکي توکي چاودلي، چې شپږ نظامي او ۱۳ عام وګړي یې ټپیان کړي.
د بلخ ملکي روغتون امر ډاکتر شفیق شایق وایي، تر دې دمه روغتون ته ۲۲ ټپیان وروړل شوي چې شپږ یې نظامیان او نور عام کسان دي.
