تاسې د وېبسایټ داسې بڼه ګورئ چې یوازې متن لري او لږ انټرنېټ کاروي. که غواړئ عکسونه او ویډیوګانې وګورئ، نو د وېبسایټ اصلي (لومړنۍ) بڼې ته ورشئ.
د وېبسایټ اصلي بڼې ته مې وروله
د وېبسایټ دې بڼې په اړه چې ډېر انټرنېټ نه مصرفوي نور معلومات دلته موندلای شئ.
طالبان: له افغان حکومت سره د بندیانو تبادله د اوس لپاره ځنډېدلې
افغان وسله طالبان وایي له افغان حکومت سره یې د بندیانو د تبادلې خبره د اوس له پاره ځنډېدلې ده.
د طالبانو یوه ویاند ذبیح الله مجاهد وویل، څرنګه چې د دوی درې بندیان ټاکلي ځای ته لېږدول شوي نه دي، دوه بهرني استادان هم چې په بدل کې یې خوشي کېدل، پرې نه ښودل شول.
ذبیح الله مجاهد بي بي سي ته تایید کړه چې د دوی بندیان تراوسه له بګرامه نه دي خوشي شوي.
افغان حکومت او په افغانستان کې دېره امریکايي ځواکونو تراوسه په دې تړاو څه نه دي ویلي.
ټاکل شوې وه د حقاني شبکې د مشر سراج الدین حقاني ورور انس حقاني او دوه نور جګپوړي ملګري یې قطر ته وسپارل شي او طالبان یې په بدل کې په کابل کې د امریکایي پوهنتون تښتولي دوه استادان - یو امریکایی او یو آسترالیایی پرېږدي.
په همدې ترڅ کې طالبانو ته نژدې یوې سرچینې، بېرته بګرام زندان ته د انس حقاني او دوو نورو طالب بندیانو د ستنولو خبره کړې ده.
لا روښانه نه ده چې د سه شنبې پر ورځ د ولسمشر اشرف غني تر اعلان وروسته چې طالب بندیان د دوو استادانو په تبادله په مشروط ډول پرېږدي، څه پېښ شول چې دغه بهیر یې وځنډاوه.
تر دې وړاندې په وسله والو طالبانو کې یوې سرچینې بي بي سي ته منلې وه چې د انس حقاني په ګډون د دوی دوه نور بندیان تېره سه شنبه له بګرام زندانه خوشي شول.
سرچینې ویلي وو چې خوشي طالب بندیان به ژره قطر ته ورسېږي.
ولسمشر محمد اشرف غني تېره سه شنبه کابل کې یوې خبري غونډې ته د وینا پرمهال له بګرام زندانه په مشروط ډول د طالبانو د درېیو غړو، حاجي مالي خان، عبد الرشید او انس حقاني د خوشي کولو اعلان وکړ.
ولسمشر غني وویل، دا کسان کابل کې د امریکایي پوهنتون د استادانو د خلاصون، او همدار راز د افغان سولې بهیر کې د پرمختګ په شرط خوشي کوي.
ولسمشر غني وویل، د دې کسانو پرېښودل سخت ګام دی، خو د امریکا په ګډون له خپلو نړیوالو همکارانو سره په سلا مشوره یې دا پرېکړه کړې ده.
له طالبانو سره د سولې مخامخ خبرو ته لار جوړول او د طالبانو له بنده د دوو بهرنیو وګړو ازادول د دې پرېکړې دلیل بلل کېده.
