تاسې د وېبسایټ داسې بڼه ګورئ چې یوازې متن لري او لږ انټرنېټ کاروي. که غواړئ عکسونه او ویډیوګانې وګورئ، نو د وېبسایټ اصلي (لومړنۍ) بڼې ته ورشئ.
د وېبسایټ اصلي بڼې ته مې وروله
د وېبسایټ دې بڼې په اړه چې ډېر انټرنېټ نه مصرفوي نور معلومات دلته موندلای شئ.
طالبان چین کې په "بین الافغاني دیالوګ" کې ګډون کوي
طالبانو ته نږدې سرچینو بي بي سي ته منلې ده چې چین به راتلونکې دوشنبه او سه شنبه، د اکتوبر پر ۲۸مه او ۲۹مه نېټه اوونۍ د بین الافغاني خبرو کوربه وي.
سرچینې وایي، د طالبان ترڅنګ به په دې ناسته کې له کابله هم یو ۲۵ کسیز پلاوی ګډون کوي، چې ښایي د ولسمشر محمد اشرف غني دویم مرستیال سرور دانش هم پکې وي.
د افغانستان په ولسمشرۍ ماڼۍ کې هم یوې سرچینې بي بي سي ته ومنله چې دا ناسته به د چین په نوښت ترسره کېږي.
سرچینې زیاته کړه چې له کابله د ورتلونکي پلاوي ترکیب نه دی وروستی شوی، او په دې اړه یې هم څه ونه ویل چې ایا د افغان ولسمشر دویم مرستیال به دې ناسته کې ګډون کوي او که نه.
په ارګ کې سرچینه وایي، دا ناسته د سولې د مذاکراتو په معنا نه ده او یوازې د افغانانو ترمنځ خپلمنځي دیالوګ دی.
ټاکل شوې ده چې تر دې ناستې وړاندې په مسکو کې هم د افغان سولې په اړه د روسیې، چین او امریکا د استازو ترمنځ درې اړخیزه ناسته وشي.
سرچینو بي بي سي ته ویلي چې د پاکستان د بهرنیو چارو وزارت استازي هم په دې ناسته کې ګډون وکړي.
بل لور ته د افغان ولسمشرۍ ماڼۍ ویاند صدیق صدیقي پر خپله ټویټر پاڼه لیکلي:
''د افغانستان خلک او حکومت د عزت سره تل پاتې سوله غواړي او دې هدف ته د رسېدو لپاره ټولو هڅو ته ژمن دي. نوموړی زیاتوي سوله تل د ولسمشر غني لومړیتوب وه او افغان حکومت یې په اړه ژمن دی. ښاغلي صدیقي زیاتوي هېواد کې هغه مهال تل پاتې او عزتمنه سوله راتلای شي، چې افغان دولت یې د بهیر مشري وکړي. ''
له دې مخکې د افغان سولې لپاره د امریکا د بهرنیو چارو وزارت ځانګړي استازي زلمي خلیلزاد له نږدې دوه میاشتنۍ دمې وروسته یو ځل بیا بهرنیو هېوادونو ته خپل سفرونه پیل کړي دي.
د امریکا د بهرنیو چارو وزارت نن دوشنبه په یوه لنډه اعلامیه کې ویلي، ښاغلی خلیلزاد او ورسره ملګری پلاوی یې پرون یکشنبه د بروکسل، پاریس او مسکو پر سفر روان شوي دي.
بل پلو د تېرې یکشنبې پر ورځ د افغانستان لپاره د اروپایي ټولنې ځانګړي استازی رولاند کوبیا وویل، د طالبانو او امریکایانو ترمنځ د سولې خبرې باید ژر تر ژره پیل شي.
خو نوموړي ټینګار وکړ چې د سولې په بهیر کې د افغان حکومت شمولیت اړین دی او زیاته یې کړه چې دا ځل باید د سولې خبرې د افغانانو په مشرۍ پیل شي او واک یې هم باید له افغانانو سره وي.
