محب طالبانو ته: سوله وکړئ که نه جګړه به وبایلئ

د افغانستان د ملي امنیت سلاکار حمد الله محب د ملګرو ملتونو عمومي غونډه کې طالبانو او د هغوی بهرنیو ملاتړ ته خبرداری ورکړی چې "د سولې له بهیر سره یوځای شئ، که نه پر وړاندې به مو جګړه روانه وساتو."

د افغانستان د ملي امنیت سلاکار حمدالله محب وايي، په ټاکنو کې چې هر څوک ګټونکی سوله به یې لومړیتوب وي.

ښاغلي محب دا څرګندونې د ملګرو ملتونو په عمومي اسامبلۍ کې کولې وویل، که طالبان سوله نه کوي نو دوی بیا چمتو دي چې پر وړاندې یې ودریږي.

نوموړي پر طالبانو او د دوی پر ملاتړو غږ وکړ چې د افغان ولس پیغام دې واوري که دوی سوله نه کوي، نو جګړې ته به دوام ورکړي چې د دې جګړې د ګټلو جوګه هم دي.

ښاغلي محب زیاته:

"طالبانو او د هغوی بهرنیو ملاتړو ته له همدې ځایه د افغان ولس یو پیغام لرم، له موږ سره د سولې په بهیر کې یو ځای شئ، که نه پر وړاندې به مو جګړه جاري وساتو. لکه څنګه چې زما همکارې او په ملګرو ملتونو کې د افغانستان استازې عادله راز تېره اوونۍ په همدې ځای کې وویل، زه هم وایم چې په دې جګړه کې بریا زموږ ده."

نوموړي زیاته کړه چې د سولې په اړه بل ګام د افغانانو ترمنځ دی او همدرانګه یې پر اوربند، جمهوري نظام او تېرو اتلسو کلونو د بریا پر ساتلو ټینګار وکړ او دا یې د افغانانو غوښتنه وبلله.

حمد الله محب، د سولې په بهیر کې افغان مېرمنې مستحقې وبللې چې په وینا یې د سول د هوکړې پر شرایطو د بحث لپاره له ۳۴ ولایتونو څخه ۱۵۰۰۰ مېرمنو ګډون کړی و.

نوموړي د افغانستان وروستیو ولسمشریزو ټاکنو ته په اشارې وویل، که د ټاکنو ګټونکی هر څوک وي سوله به د افغان دولت لومړیتوب وي.

ښاغلي محب زیاته کړه، په افغانستان کې شاوخوا درې میلیونه افغانانو خپل ژوند په خطر کې واچاوه او رایه یې وکاروله چې دا رایه اچونه د ولسواکۍ او ملي حاکمیت لپاره رایه وه.

د افغانستان د ولسمشرۍ ټاکنې د تېرې شنبې په ورځ (تله شپږمه) ترسره شوې، چې د ټاکنو کمېسیون د معلوماتو له مخې، څه باندې دوه میلیونه رایه اچوونکو ګډون پکې کړی و.

دغو ټاکنو ته شاوخوا نهه میلیونه رایه اچوونکو نوملیکنه کړې وه.