د افغانستان کرېکټ بریا په اړه د علي وزیر ټوکه
د عکس سرچینه، Getty/ Ali Wazir Facebook
- Author, حمید شجاع
- دنده, بي بي سي، لندن
د پاکستان د قامي اسمبلۍ غړي او د پښتون ژغورنې غورځنګ یو مشر علي وزیر د افغانستان او پاکستان ترمنځ پرونۍ کرېکټ لوبې ته په اشارې سره په طنزیه ډول ویلي، پاکستان دا لوبه ځکه وبایلله چې د پښتون ژغورنې غورځنګ غړو له افغان لوبډلې سره مرسته وکړه.
ښاغلي وزیر پر خپله ټوېټر پاڼه لیکي:
"له کره سرچینو مالومه شوې ده چې د پښتون ژغورنې غورځنګ ځینې کسان له افغان کرېکټ لوبډلې سره په دوامداره توګه په اړیکه کې وو او د پاکستاني شاهینانو مخه یې ونیوله".
داسې ښکاري چې ښاغلی وزیر هغو ناندریو او تورونو ته په طنزیه ډول اشاره کوي چې له تېرې څه مودې راهیسې یي د پاکستان خواله رسنیو کې تود بحث را پارولی.
تېره اونۍ په پلازمېنه اسلام اباد کې د یوې لس کلنې پښتنې ماشومې تر وژنې وروسته د پښتون ژغورنې غورځنګ په دې قضیه کې د ځایي پولیس چارواکو د بې غورۍ پر ضد پراخ احتجاجونه وکړل.
د همدې احتجاجونو په ترڅ کې د غورځنګ فعالانو پر خواله رسنیو د (زه هم افغان یم) په نامه یو کمپاین یا هشټګ پیل کړ.
د دې کمپاین لامل دا و چې د (اې ار وای) په نامه یوه پاکستاني تلویزیون تور پورې کړی و چې اسلام اباد کې وژل شوې ماشومه فرشته مومند اصل کې افغانه ده او پښتون ژغورنې غورځنګ دې قضیې ته د سیاسي ګټو لپاره هوا ور کوي.
د یاد تلویزیون دا ادعا او د قضیې پوښښ په پراخه کچه وغندل شول او خلکو ور سره د پرېکون غوښتنه وکړه. په دې ترڅ کې د پاکستان ګڼو پښتنو فعالانو پر خپلو ټوېټر او فېسبوک پاڼو ولیکل چې "زه هم افغان یم".
خو د دوی دې کمپاین مخالفتونه هم را وپارول او ګڼ شمېر کسانو یې ځواب کې ورته لیکلي چې که تاسې رښتیا هم ځان افغان بولئ نو افغانستان ته ولاړ شئ.
د عکس سرچینه، Getty Images
تر دې پېښې هم وړاندې تېره اپرېل میاشت کې د پاکستان د پوځ د عام اړیکو مشر تورنجنرال اصف غفور پر ښاغلي علي وزیر مخامخ نیوکه کړې وه چې له اجازې پرته او په نارسمي ډول د پاکستان او افغانستان ترمنځ پرتې ډیورنډ نه ور اوښتې او هلته یې له یو شمېر افغان قامي مشرانو سره کتلي.
جنرال اصف تور لګولی و چې د علي وزیر دا ډول کړنې د پاکستان د ریاست په تاوان تمامېږي او هغه وخت یې ان دا خبرداری هم ور کړی و چې د پښتون ژغورنې غورځنګ وخت پوره دی.
د پاکستان پوځ پر غورځنګ تل تور لګوي چې له افغان استخباراتو سره اړیکي لري، خو غورځنګ دا تورونه ردوي.
د تېرې میاشتې دې وضعیت ته په کتو سره طبعاً چې د افغانستان او پاکستان تمریناتي کرېکټ لوبه د ډیورنډ کرښې دواړو خواو ته د ګڼو کسانو لپاره جالبه وه.
د افغانستان بریا که څه هم په پاکستان کې خلک خپه کړل، خو په افغان پلازمېنه کابل کې بیا د شپې تر ناوخته د خوشحالۍ ډزې کېدلې.
نو ښکاري چې علي وزیر هم د ځان په اړه د پاکستاني چارواکو تورونه او ادعاوې نه وې هېرې کړې او له دې فرصته یې په ګټې اخیستو د طنر په ژبه پر دوی یو ځل بیا نیوکه وکړه.
