معترضو کاندیدانو د ولسي جرګې لومړۍ غونډې مخه ونیوه

له کابل ولایت څخه ولسي جرګې ته د هغو کاندیدانو او د مظاهره چې په لومړي سر کې بریالي اعلان شوي وو، د دې سبب شوه چې د ولسي جرګې لومړۍ رسمي غونډه تر سره نه شي.

مظاهره کوونکو کاندیدانو نن (شنبه مې ۱۱) د ملي شورا په دراوزه کې چا ته د ننوتو اجازه نه ورکوله، چې د ۱۷ تقنینې دورې لپاره لومړي غونډې ته ورغلي وو.

ټاکل شوې وه چې نن د ولسي جرګې د مشرتابه او اداري پلاوي ټاکنې وشي، خو مظاهره کوونکو ټینګار کاوه چې د کابل پایلو تر اعلانه مخکې باید ټاکنې ونه شي.

دوې اوونۍ وړاندې د ملي شورا د ۱۷ تقنینې دورې پرانېسته وشوه، خو د ولسي جرګې د رییس او اداري پلاوي ټاکنې په پرلپسې ډول له تېرو دوه اونیو راهیسې ځنډيږي.

په ولسي جرګه کې د پکتیا د خلکو استازې راضیه سعادت منګل وايي، د هېواد وضعیت ایجابوي چې د ولسي جرګې رسمي غونډې څومره ژر چې ممکن وي پیل شي.

نوموړې وايي، د وکیلانو یوه پلاوي له معترضو کاندیدانو سره د خبرو مسولیت اخیستی او تمه کېږي چې دوی به له خپلې دغې اعتراضه واړوي.

دوی ټینګار کاوه چې د کابل د رایو په اړه هر ډول نوي پریکړې به هم له جنجاله خالي نه وي.

د ولسي جرګې د داخلي کړنلارو او اصولو له مخې د مشر او اداري پلاوي ټاکنې د جرګې په لومړی غونډه کې کېږي، چې بیا د کمیسیونونو جوړولو ته لار هواره او ولسي جرګه په رسمي ډول غونډې پیل کړي.

بل لور ته د ټاکنو خپلواک کمیسیون پرته له دې چې د کابل ولایت د پایلو اعلان کره وخت وښيي وايي، چټک کار روان دی تر څو د کابل پایلې ژر اعلان شي.

له غزني پرته د ولسي جرګې ټاکنې د تېر کال د میزان په میاشت کې وشوې.