د هرات پخوانی والي په زندان محکوم شو

د هرات پخوانی والي او د افغانستان د ټاکنو د خپلواک کمیسیون پخوانی مشر احمد یوسف نورستانی د درنو جرمونو پر وړاندې د مبارزې د څارنوالۍ له خوا په ۱۳ میاشتې زندان محکوم او د یو میلیون افغانیو جریمه ورته وټاکل شوه.

محکمه ادعا کوي چې ښاغلي نورستاني په ۲۰۰۹ مېلادي کال کې د هرات د ولایت پر مهال یو میلیون افغانۍ د "ملي بس تصدۍ" له خزانې اخیستي او بېرته یې نه وې ستنې کړي.

ښاغلي نورستاني په محکمه کې حضور نه درلود او دغه حکم د هغه په غیاب کې صادر شو. د محکمې قاضي وویل تورن کولی شي د بیا کتنې غوښتنه ورکړي.

د ښاغلي نورستاني وکیل د هغه په دفاع کې وویل د هغه موکل یادې پیسې هغو سوداګرو ته ورکړي وې چې د ولایت مقام یې پورړی و.

هغه ادعا وکړه، کله چې سید حسین انوري د هرات والي و، د دغو پیسو په ارزښت یې له ځايي دوکاندارانو جنسونه اخستي ول او کله چې ښاغلی نورستاني د هرات والي وټاکل شو، دوکاندارانو د خپلو پیسو غوښتنه وکړه او لاریونونه یې په لار واچول.

د وکیل په وینا، ښاغلي نورستاني یو میلیون افغانۍ پور ورکوونکو ته ورکړې.

نورستانی، خبر جوړوونکې څېره

ښاغلي نورستاني په ۲۰۱۴ کال کې د افغانستان د ټاکنو د کمیسیون مشرتوب لا پر غاړه درلود چې د ولسمشرۍ مخکینۍ ټاکنې یې هم پلي کړې. هغه په دغه وخت کې د ټاکنیزو جنجالونو له امله، د افغانستان په یوې خبر جوړونکې څېرې بدل شو.

د هغه تر مشرتابه لاندې د ټاکنو لانجه د ملي یووالي د حکومت په جوړېدو سره پای ته ورسېده. په هغه وخت کې ښاغلي نورستاني باندې د اداري فساد او ناوړه مدیریت تورونه ولګېدل.

کله چې په ۱۳۹۵ کال کې تمه کېده ښاغلی نورستانی په اسپانیه کې د افغانستان سفیر په توګه وټاکل شي، خبر یې له نیوکو سره مل و او ارګ له خپلې پرېکړې ډډه وکړه.

په دې برخه کې د ښاغلي نورستاني د ګومارنې پر وړاندې د بهرنیو چارو وزیر صلاح الدین رباني او د ښاغلي عبدالله عبدالله پلویانو مخالفت کړی وو. ښاغلي عبدالله ښاغلی نورستانی د ۱۳۹۳ کال په ټاکنو کې د پراخو او تنظیم شویو ټګیو مسول وباله.

ښاغلی نورستانی هغه وخت د ټاکنو په بهیر کې د ستونزو له کبله محاکمه نشو، او د ۱۳۹۷ کال په مني کې افغان ولسمشر ښاغلی نورستانی د مشرانو جرګې د غړي په توګه وټاکه.