دوحې ناسته؛ د طالبانو او امریکایانو خبرو کې دوه ورځې وقفه

په قطر کې د طالبانو دسیاسي دفتر ویاند سهیل شاهین بي بي سي ته ویلي، په دوحه کې د دوی د مذاکراتي ټیم او د امریکایي پلاوي ترمنځ پر دویمه ورځ ګټورې خبرې وشوې، خو اوس دواړو خواو د دوه ورځو لپاره وقفه یا دمه اخیستې ده. سرچیني وایي چې په دې دوه ورځو کې به دوی له خپلو مشرانو سره سلا مشوره کوي.

د دویمې ورځې تر خبرو وروسته د طالبانو د پلاوي یوه غړي او د دې ډلې د واکمنۍ پر مهال د کورنیو چارو وزیر ملا خیرالله خیرخواه بي بي سي ته وویل، پر دویمه ورځ ګټورې خبرې وشوې او دواړه خواوې د بهرنیو ځواکونو پر وتلو او د بل چا پر ضد د افغانستان د خاورې پر نه کارېدلو وغږېدل.

یوې بلې معتبرې طالب سرچینې بي بي سي ته وویل، د تخنیکي کومیټو چارې هم "تقریباً بشپړې شوې دي "، او دواړو خواو اړونده دوسیې چمتو کړې دي.

پرون ځینو سرچینو بي بي سي ته منلې وه چې ملګري ملتونه او د ناروې هېواد هم دې خبرو کې ښکېل دي، او په تخنیکي برخه کې له ښکېلو غاړو سره مرسته کوي.

سهیل شاهین پرون سه شنبه بي بي سي سره یوه ځانګړې مرکه کې وویل، طالبان افغان حکومت سره نه، بلکې افغان ولس سره خبرې کوي.

د یوې بلې پوښتنې په ځواب کې ښاغلي شاهین وویل، طالبان د شریعت په رڼا کې د ښځو د تعلیم او کار مخالف نه دي او په ۱۹۹۰مه لسیزه کې دا پالیسي نه وه چې ښځې تعلیم او کار وکړي:

"کله چې طالبان په ۱۹۹۰مه لسیزه کې واک کې وو، پالیسي یې دا نه چې ښځې تعلیم او کار وکړي، چې په وینا یې هغه مهال د 'بودیجې او اسانتیاوو نشتوالي' ستونزې وې."

خو کله چې له ښاغلي شاهین وپوښتل شول، دا چې طالبان له افغان حکومت سره د سولې په تړاو خبرې نه غواړي، څه فکر کوي چې له درېیم اړخ سره به خبرې کومه پایله ورکړي؟

سهیل شاهین وویل: "موږ دا نه ردوو چې افغان حکومت د شخړې یوه برخه نه ده، خو موږ اوس د افغان مسلې په بهرني اړخ کې یو چې له امریکایانو سره د دوی د ځواکونو پر وتلو غږېږو."

دی وايي، له امریکايي پلاوي سره د خبرو پایلو او یوې هوکړې ته د رسېدو لپاره یې یوه ډله ټاکلې ده.

دغه طالب ویاند ویلي، د افغان شخړې په تړاو ځینې کورنۍ مسلې شته چې د اجنډا له مخې پرې وروسته خبرې کېدای شي.