خلیلزاد: د بهرنیو ځواکونو د وتلو لپاره مهالوېش نشته

د افغان سولې لپاره د امریکا د بهرنیو چارو وزارت ځانګړی استازی زلمی خلیلزاد وايي، له طالبانو سره خبرو کې له افغانستان د بهرنیو ځواکونو پر وتلو کومه هوکړه نه ده شوې.

زلمی خلیلزاد خپل ټوېټر کې لیکي، وروستیو ورځو کې یې له ځینې طالب چارواکو په انفرادي ډول دا ادعا اورېدلی چې د ځواکونو وتلو مهالوېش جوړ شوی.

"نن له دې ادعا شاتګ وشو، باید روښانه وي چې د ځواکونو وتلو مهالوېش نشته".

د زلمي خلیلزاد تر دې ټوېټ یوه ورځ مخکې د طالبانو یوه غړي مولوي حنفي مسکو غونډه کې وویل، د راتلونکې اپریل میاشتې تر وروستیو نیمايي امریکايي سرتیري له افغانستان ووځي.

خو د نوموړي تر څرګندونو وروسته له امریکايي پلاوي سره خبرو کې د طالبانو د پلاوي مشر شیرمحمد عباس ستانکزي دا څرګندونې رد کړې او ویې ویل خبرې روانې دي او پر پلان هوکړه نه ده شوې.

طالبان او امریکا دواړه مني چې د دوحې وروستیو خبرو کې تر ډېره خبرې د بهرنیو ځواکونو پر وتلو او دې څرخېدې چې له هغه وروسته به افغانستان د القاعده او نورو وسلوالو ډلو لپاره په مرکز نه بدلېږي.

ولسمشر ټرمپ د چارشنبې په ورځ( د پرورۍ ۶) کانګرېس ته کلنۍ وینا کې وویل، که له طالبانو سره یې خبرو پرمختګ وکړ بیا افغانستان کې ځواکونه کمولی شي.

تېر ډېسمبر کې امریکايي رسنیو وویل، سپینې ماڼۍ له دفاع وزارت غوښتي چې له افغانستان د ټولو یا پام وړ امریکايي ځواکونو د وتلو لپاره شته غوراوي برابر کړي.

د تېرې جنورۍ لومړیو کې سپینې ماڼۍ ووویل، له افغانستان د نژدې ٧٠٠٠ امريکايي سرتېرو د اېستنې په اړه د ولسمشر ټرمپ له لارښوونې وروسته اوس پر دغه پلان کار پيل شوى.

که څه هم ارګ ویل چې د امریکايي ځواکونو وتل به پر امنیت ناوړه اغېز ونه کړي، مګر ځینې امریکايي پوځي چارواکو ویل، د پوځ وتلو سره یې افغانستان د طالبانو لاس ته ورځي.

د امريکا مشرانو جرگې هم د پرورۍ په لومړۍ نېټه افغانستان کې د امريکايي سرتېرو د شمېر کمولو او له سوريې د امريکايي ځواکونو د اېستنې په تړاو د ولسمشر ټرمپ د تگلارې پر وړاندې خپل مخالفت څرگند کړ.

امريکايي سناتورانو يوې لايحې ته رايه ورکړه، چې له سوريې او افغانستان د ځواکونو د چټکې اېستنې په خلاف ولسمشر ټرمپ ته خبردارى ور کوي