'' طالبان د مسکو سولې خبرو کې ګډون کوي''
د عکس سرچینه، Getty Images
د روسي رسنیو رپوټونو کې ویل شوي، د دغه هېواد بهرنیو چارو وزیر سرګي لاوروف تایید کړې، چې افغان طالبان به راتلونکې میاشت د مسکو سولې خبرو کې ګډون وکړي.
روسیه د افغانستان راتلونکي په تړاو د خبرو یوه خپله لړۍ لري.
له دې مخکې د خبرو دغسې پړاو کې پاکستان، چین او یو شمېر نورو سیمه ییزو اړخونو برخه درلوده، خو دا به لومړی ځل وي، چې طالبان هم دغو خبرو کې ګډون کوي.
د روسیې بهرنیو چارو وزیر د اوسنیو څرګندونو په تړاو طالبانو لا هم څه نه دي ویلي.
د سږ کال لومړیو کې د روسیې د بهرنیو چارو وزارت وویل، طالبان باید له افغان چارواکو سره د سولې خبرو ته کیني او په وینا یې روسیه د طالبانو او افغان حکومت ترمنځ د سولې خبرو کوربه توب ته چمتو ده.
خو هغه مهال په کابل کې د امریکا سفیر د روسیې له خوا د افغان سولې په تړاو د احتمالي غونډې پر پایلو شک څرګند کړی و.
د کابل لپاره د امریکا نوي سفیر جان بس، د جنورۍ پر ۱۸مه ویلي و، ډاډه نه دی چې د روسیې په کوربه توب احتمالي جوړېدونکې غونډه به د سولې له بهیر سره مرسته وکړي او که څنګه؟
د عکس سرچینه، AFP/GETTY IMAGES
یو شمېر کارپوهان ګومان کوي روسیه غواړي په دې توګه د امریکا د نفوذ مخنیوي کولو سره افغانستان کې خپل نفوذ ډېر کړي. وسله والو طالبانو په دې تړاو تر اوسه څه نه دي ویلي.
خو روسیه پر امریکا نیوکه کوي، چې ګواکې افغانستان کې په سوله راوستو کې پاتې راغلې او دوی غواړي په سوله کې خپل مثبت رول ولوبوي.
