تاسې د وېبسایټ داسې بڼه ګورئ چې یوازې متن لري او لږ انټرنېټ کاروي. که غواړئ عکسونه او ویډیوګانې وګورئ، نو د وېبسایټ اصلي (لومړنۍ) بڼې ته ورشئ.
د وېبسایټ اصلي بڼې ته مې وروله
د وېبسایټ دې بڼې په اړه چې ډېر انټرنېټ نه مصرفوي نور معلومات دلته موندلای شئ.
امریکا: له طالبانو سره د سولې خبرو کې ګډون ته چمتو یو
نړیوالې ټولنې د افغان دولت او وسله والو طالبانو ترمنځ د وروستي اوربند ملاتړ کړی او تمه یې څرګنده کړې چې د افغان ولسمشر محمد اشرف غني له وروستي اعلان سره سم به دا اوربند نور هم وغځېږي.
امریکا، اورپایي ټولنې، ناټو ځواکونو او د برېتانیا د بهرنیو چارو وزارت په بېلابېلو اعلامیو کې د یاد اوربند د غځولو په اړه د ولسمشر غني د تېرې شپې اعلان ستایلی او پر وسله والو طالبانو یې هم غږ کړی چې دې اعلان ته مثبت ځواب ووایي.
له وسله والو طالبانو سره د اوربند د غځولو په اړه د ولسمشر غني تر اعلان وروسته، په افغانستان کې د ناټو ځواکونو په یوه اعلامیه کې د دې پرېکړې هرکلی کړی.
په اعلامیه کې د امریکا د بهرنیو چارو وزیر مایک پومپیو څرګندونو ته هم اشاره شوې.
نوموړي تېره ورځ ویلي وو، د افغان دولت او وسله والو طالبانو ترمنځ د سولې په خبرو کې به په دې هېواد کې د بهرنیو ځواکونو د رول په اړه هم خبرې کېږي.
ښاغلي پومپیو ویلي، امریکا به د دا ډول خبرو ملاتړ کوي او ګډون به هم پکې کوي.
د بهرنیو ځواکونو په دې اعلامیه کې راغلي چې یاد اوربند یوازې تر وسله والو طالبانو محدود دی، او دوی به د داعش په ګډون د نورو ترهګرو ډلو پر ضد خپلو عملیاتو ته دوام ورکوي.
په ورته وخت کې په افغانستان کې د ملګرو ملتونو استازولۍ یوناما هم په یوه اعلامیه کې افغان دولت او وسله وال طالبان ستایلي چې اعلان شوي اوربند ته ژمن پاتې شول.
یوناما همدا رنګه د یاد اوربند د غځولو په اړه د ولسمشر غني د تېرې شپې اعلان هم ستایلی دی.
زړور ګام
د یوناما په اعلامیه کې راغلي، په تېرو دوه ورځو کې څرګنده شوه چې افغان ولس سولې او اوربند ته څومره لېواله دی.
بل لور ته د اروپایي ټولنې د بهرنیو چارو مشرې فېدریکا موغېریني هم ویلي، د کوچني اختر اوربند افغان ولس ته یوه نوې هیله ورکړې، او افغانان د تېرو ۱۷ کلونو له جګړې ستړي شوي دي.
د اروپایي ټولنې په اعلامیه کې راغلي، د ولسمشر غني لخوا د اوربند د غځولو اعلان یو زړور ګام دی.
د بريتانیا د بهرنیو چارو وزیر هم په یوه اعلامیه کې ویلي، د اوربند د غځولو له اعلانه مالومېږي چې افغان حکومت د خپل ولس غوښتنو ته غوږ ږدي.
نوموړي پر وسله والو طالبانو هم غږ کړی چې د خلکو غوښتنو ته درناوی وکړي او د ولسمشر غني اعلان ته مثبت ځواب ووایي.
