افغان حکومت: د پاکستان له خبرو ښکاري چې اوس د همکارۍ روحيه لري
د عکس سرچینه، ARG
افغان حکومت و ایي د پاکستان په دریځ کې بدلون تر سترګو کېږي او اوس د همکارۍ روحیه لري. د ولسمشرۍ ماڼۍ دا څرګندونې وروسته له هغه مخې ته راځي چې د پاکستان د پوځ لوی درستیز قمر جاويد باجوه له افغان ولسمشر محمد اشرف غني سره په کابل کې وکتل.
د افغان ولسمشر مرستیال ویاند نجیب الله ازاد له بي بي سي پښتو سره په خبرو کې ويلي، "د امریکا د ستراتېژۍ له اعلانېدو وروسته د پاکستان په موقف کې تغير ليدل کېږی او له خبرو داسې ښکاري چې د همکارۍ روحیه لري".
د ښاغلي ازاد په وينا، له پاکستانه يې غوښتي چې د هغو ترهګرو پر وړاندې چې په افغانستان کې جنګېږي بايد عملي ګامونه پورته کړي.
د ملي امنیت دوه پخواني مشران غبرګون
د افغانستان د ملي امنیت پخواني مشران رحمت الله نبیل او امرالله صالح په دې باور نه دي چې د افغانستان لپاره د امریکا له نوې ستراتیژۍ وروسته به د پاکستان دریځ بدل شوی وي.
دې لیکنه کې له social media راخیستل شوي مواد شته. له ښودلو وړاندې یې ستاسې اجازه پکار ده، ځکه ښایيکوکیز یا بله تکنالوژي پکې کارول شوې وي. کولی شئ له اجازې مخکې د social media site پالیسي ولولئ. د دې لپاره غوښتنه ومنئ او مخکې لاړ شئ
د پوسټ X پای
رحمت الله نبیل په خپل ټوېټ کې لیکلي چې پاکستان په دغه ګام سره د امریکا ستراتیژي نرموي:
"په ورته مهال به ای اېس ای د مني په موسم کې وسلوال طالبان په افغانستان کې وینې بهولو ته تیاروي".
پر رحمت الله نبیل سربېره د ملي امنیت بل پخوانی مشر امرالله صالح هم په دې نظر دی چې افغان حکومت دې د پاکستانیو چارواکو دا ډول لیدنو ته هیله من کېږي نه.
هغه هم په یوه ټوېټ کې د پاکستان د دریځ بدلېدل د حقاني شبکې پرضد د دغه هېواد په عملیاتو پورې تړلي او وايي:
"تر هغه باید انتظار وشي چې دغه هېواد اول پاکستان زېږولي حقاني ترهګر له منځه یوسي".
افغان ولسمشر محمد اشرف غني د پاکستان پوځ له لوی درستيز او ورسره ډلې سره په ليدنه کې دغه سفر د دواړو هېوادونو تر منځ يو نوی پړاو او د ښې همکارۍ لپاره يو نوی فرصت بللی دی.
د افغانستان او سيمې په اړه د امریکا د ستراتېژۍ تر اعلان وروسته دا لومړی ځل دی چې د پاکستان پوځ مشر افغانستان ته سفر کوي.
امریکا په خپلې نوې ستراتېژۍ کې پاکستان ته خبرداری ورکړی چې په افغانستان کې دې د وسله والو مخالفینو له ملاتړه لاس واخلي. د امریکا ولسمشر ډونلډ ټرمپ ویلي چې نور په پاکستان کې د اورپکو د شتون په اړه چوپ نشي پاتې کېدای.
د افغانستان د ولسمشرۍ ماڼۍ د خبرپاڼې له مخې، په دغه ليدنه کې په بېلابېلو موضوګانو خبرې شوې، په ځانګړې توګه د سيمې امنيت، سولې، د اسلام اباد او کابل تر منځ دوه اړخيزې اړيکې او د لنډمهالې او اوږدمهالې سوداګرۍ په اړه يې له پاکستاني چارواکو سره نظرونه شريک کړي دي.
ولسمشرۍ ماڼۍ وايي، پاکستان د ترهګرۍ سره د مبارزې ژمنه کړې چې په وينا يې د دواړو هېوادونو لپاره يو لوی ګواښ دی.
د عکس سرچینه، ARG
په عيني حال کې افغان چارواکي ادعا کوي چې په افغانستان کې د سولې کلۍ د پاکستان په لاس کې ده. ولسمشر غني څو ځله ويلي، کابل بايد لومړی له پاکستان سره سوله وکړي. په دې ناسته کې ښاغلي باجوه د افغانانو په مشرۍ له سولې ملاتړ څرګند کړ.
همدا ډول ښاغلي غني ويلي، مناسبه فضا رامنځ ته شوې او د باور رامنځ ته کولو لپاره بايد عملي ګامونه واخيستل شي.
د افغانستان او سيمې په اړه د امریکا د ستراتېژۍ تر اعلان وروسته دا لومړی ځل دی چې د پاکستان پوځ مشر افغانستان ته سفر کوي.
ولسمشر ټرمپ تېر اګسټ کې د افغان ستراتیژۍ د اعلانولو پر مهال پر پاکستان غږ وکړ چې د وسلوالو ملاتړ پرېږدي او که نه تاوان به وکړي.
ډونلډ ټرمپ دا هم وویل، چې پاکستان له یوې خوا د امریکا مرستې ترلاسه کوي، خو په ورته مهال یې داسې وسلوالو ته هم پټنځي ور کړي چې په افغانستان کې امریکايي ځواکونه په نښه کوي.
