ولسمشر غني نجونو ته د پوهنې وزارت د جامو طرحه رد کړه

د افغانستان ولسمشر دفتر وايي، د نجونو لپاره د پوهنې وزارت د جامو طرحه د ولسمشر له خوا رد شوې او د ولسمشر غوښتنه دا ده چې دا طرحه دې د افغانستان کلتور، خلکو ژوند او د والدینو مشورې ته په کتو جوړه شي.

د افغانستان د ولسمشر مرستیال ویاند دواخان مینه پال بي بي سي پښتو وېبپاڼې ته وویل: "د ولسمشر غوښتنه دا ده چې دغه یونیفورم دې اقتصاد، د افغانستان فرهنګ، د خلکو ژوند او د والدینو مشورې ته په کتو غوره شي."

د ښوونځیو د زده کوونکو نوی یونیفورم؛ اجباري که اختیاري!

وړاندې د پوهنې وزارت بي بي سي ته وویل، د نجونو لپاره یې نوی یونیفورم جوړ کړی، چې د ابتدائیه ښځینه زده کوونکو د کمیس رنګ ابي، او پرتوږ او سپین ټیکری، کمیس یې لنډ تر زنګنونو پورې او د متوسطه او لېسې د زده کوونکو د کمیس رنګ فولادي، سپین ټیکری، کمیس تر پښو پورې اوږد غوره شوی دی.

پوهنې وزارت ویلي، دا طرحه سږ کال اختیاري ده چې په ازمېښتي ډول کارول کېږي، که دغه لایحه د منلو وړ وه او خلکو خوښه کړه، نو راتلونکی کال به اجباري بڼه غوره کړي.

د پوهنې وزارت د نشراتو رییس کبیر حقمل بي بي سي ته وولی، د نجونو د کالیو رنګ او ډول یې وزیرانو شورا ته هم وړاندې کړی او هغوی ورسره منلی دی.

ښاغلي حقمل زیاته کړه، د دغه لباس ډول او لایحه د یوه ځانګړي قانون له مخې، د وزارت د علمي شورا د پرله پسې ناستو پایله کې، چې ښځې هم په کې دي، جوړ شوی دی.

له دغو عسکونو خپرولو وروسته په خواله رسنیو کې ډېر غبرګونه را پورته شول. ځینو کسانو د دغو جامو پر ضد پاڼې جوړې کړې.

یو شمېر انجونو بي بي سي سره خبرو کې دا جامې د عربانو ښځو غوندې بولي او وویل ولې پوهنې وزارت د افغانانو جامې (کمیس او مناسب پرتوږ) نه دي غوره کړي؟

له ولسمشر غني له امر وروسته د پوهنې وزارت په دې اړه څه نه دي ویلي.