'عطامحمد نور د ولایت له څوکۍ ګوښه کېږي'
د عکس سرچینه، Getty Images
د بلخ ولایت سرپرست والي او د جمعیت اسلامي ګوند اجراييه مشر عطا محمد نور ویلي چې دی چمتو دی د ولایت څوکۍ پرېږدي. ښاغلي نور د دې کار په بدل کې په کابینه کې د بدلون غوښتنه کړې ده.
د عطا محمد نور وياند امير فرهاد وايي ښاغلي نور د ګلبدین حکمتیار په مشرۍ د حزب اسلامي له گوند سره د سولې بهير د ملاتړ ترڅنگ ځینې ملاحظې هم درلودې چې اوس تر ډېره حل شوي دي.
ښاغلی فرهاد وایي د بلخ د چارسمبالي والي یو شمېر وړاندیزونه چې هغه کې د وزارتونو او معینیونو په کچه مقررۍ وې، منل شوي.
همدارنګه ښاغلي نور له ګلبدین حکمتیار سره د سولې خبرو ملاتړ کړی خو ځینې شرطونه یې هم وړاندې کړي.
د ښاغلي نور ویاند امیر فرهاد بي بي سي ته د ولسمشرغني او د بلخ د سرپرست والي ترمنځ د خبرو په اړه وویل، ښاغلي نور غوښتي چې د حزب اسلامي ټول جنګیالي دې خپله وسله پر ځمکه کېږدي.
د عکس سرچینه، Getty Images
د ښاغلي فرهاد په وینا "دوی دې خپلې وسلې د سولې بهیر ته وسپاري ". فرهاد زیاته کړه " حزب اسلامي باید هغه ټولې سیمې چې د دوی تر کنترول لاندې دي یا هلته نفوذ لري، د ملي وحدت حکومت ته وسپاري. "
د عطامحمد نور په استازیتوب ښاغلي فرهاد پر دې ټینګار وکړ چې په هوکړه لیک کې باید د افغانستان د اساسي قانون او نورو قوانینو یادونه وشي، او حزب اسلامي باید دا ټول ومني او ملاتړ یې وکړي.
د عکس سرچینه، Getty Images
ښاغلي نور دا څرګندونې وروستیو کې له ولسمشر محمد اشرف غني سره تر ځینو بحثونو او مشورو وروسته کړې دي.
د ښاغلي نور ویاند د ده له خولې وویل چې د دې وخت رارسېدلی چې له دندې ګوښه شي ځکه "که اوبه هم په یوه ځای پاتې شي، نو خوسا کېږي ".
د ولسمشریزو ټاکنو پر مهال عطامحمد نور د ډاکتر عبدالله عبدالله کلک ملاتړی و او هغه مهال یې ولسمشرۍ ته پر نوماند ډاکتر اشرف غني باندې لفظي ګوزارونه وکړل.
د عکس سرچینه، Getty Images
د ولسمشر په توګه د ښاغلي غني له ټاکل کېدو وروسته، سره له دې چې په ولایتونو کې ډېر ادلون بدلون راغی خو ښاغلی نور تر اوسه هم د بلخ چارسمبالی والي پاتې شو.
د عکس سرچینه، Getty Images
