غني: د سولې پر وړاندې هېڅ بې دلیله خنډ نه شم منلی

افغان ولسمشر محمد اشرف غني وايي، دولت د ګلبدین حکمتیار په مشرۍ له حزب اسلامي سره د سولې هوکړې ته نژدې شوی دی.

نوموړي په ولسمشرۍ ماڼۍ کې د اختر له لمانځه وروسته وینا کې وویل، چې د سولې په لار کې هېڅ راز خنډ ورته د منلو نه دی.

ولسمشر غني وویل، چې له حزب اسلامي سره هوکړه به په نژدې ورځو کې نهايي شي، چې د نوموړي په وینا دا د هېواد د سولې په لار کې یو مهم ګام دی:

''د سولې عالي شورا او حزب اسلامي له مرکچیانو مننه کوم، چې پام وړ پرمختګ یې کړی دی. هیله مند یو، چې ژر به دغه هوکړه نهايي شي او موږ به د سولې راتګ په لار کې د یوه مهم ګام شاهدان واوسو. لږ مسایل پاتې دي، چې لنډ مهال کې به حل شي او د حل کېدو وړ دي.''

ښاغلي غني د افغانستان له سیاستوالو او مسولینو وغوښتل، چې د ده په خبره د سولې موضوع ډېره جدي وبولي او د ولس غوښتنه عملي کړي.

نوموړي زیاته کړه ''د افغانستان د ولسمشر په توګه د سولې پر وړاندې هېڅ داسې خنډ چې دلیل و نه لري نه شم منلی''.

له دې نه وړاندې د اسلامي حزب مشر ګلبدین حکمتیار هم خبرو کېپرمختګ تائید کړی و، خو ادعا یې درلوده، چې وايي، د 'حکومت د داخلي ستونزو له امله د هوکړې لاسلیکېدل ځنډېدلي.'

د جمعیت اسلامي دریځ

له هغو ګنګوسو سره همهاله چې ګواکې د افغان چارواکو تر منځ له حزب اسلامي سره د هوکړې پر سر اختلافونه دي، د جمعیت اسلامي ګوند اجرائیه رئیس او د بلخ سرپرست والي عطا محمد نور په مزار شریف کې د اختر په مراسمو کې وویل “د جمعیت دریځ دا دی چې د حکومت او اسلامي حزب تر منځ د دې هوکړه لیک ملاتړ کوي او موږ یې هم ملاتړ کوو”.

د سولې شورا

تمه وه چې له اختر وړاندې به د دواړو لورو تر منځ د سولې تړون لاسلیک شوی وای خو اوس د افغانستان د سولې شورا په یوه خبر پاڼه کې ویلي، چې د اختر رخصتیو په ګډون د یو شمېر تخنیکي مسایلو له کبله د هوکړه لیک لاسلیک ځنډیدلی دی.

د سولې شورا په اعلامیه کې دغه راز راغلي، چې د ځینو ګنګوسکو برعکس د افغانستان ولسمشر محمد اشرف غني او اجراییه رییس عبدالله عبدالله د سولې شورا په مشرتابه د دغو خبرو ملاتړ کړی او دا یې په هېواد کې د سولې ټینګښت لپاره یو مهم ګام بللی.