د سودان پوځ د بهرنيو ډيپلوماتانو پر ايستلو سلا کړې
د عکس سرچینه، Reuters
د سودان پوځ د بهرنيو ډيپلوماتانو پر ايستلو سلا کړې، داسې حال کې چې جګړه لا روانه ده.
د سودان پوځ ويلي، د امريکا، بريتانيا، فرانسې، چين او سعودي ډيپلوماټانو او وګړو ايستلو لپاره به لار هواروي. د سعودي حکومت لومړی دی، چې چې د خلکو ايستلو عمليات پيلوي.
دا پرمختيا داسې مهال راځی، چې د سودان پلازمېنې خرطوم لروبر کې د نښتو او درنو ډزو ډزو غږونه لا انګازې کوي.
د سودان دواړو پوځي ډلو ترمنځ جګړه نژدې یوه اونۍ مخکې پیل شوې وه.
له یوې خوا د بهرنیو ډيپلوماتانو د ایستلو هڅې روانې دي له بلې خوا بیا د اختر لمانځنو لپاره يو پلان شوی اوربند ناکامه شو.
په داسې حال کې چې پوځ او د چټک ملاتړ ځواکونو د درې ورځني اوربند ټټر وهلی و.
تر دې مهاله ملګرو ملتونو اټکل کړی، له هغه راهيسې چې جګړه پيل شوې، د سودان لروبر کې لږترلږه ۴ سوه کسان وژل شوي دي.
د عکس سرچینه، Getty Images
د بي بي سي افريقا چارو خبریال فرډينانډ اومونډي نيروبي کې دی.
دی وايي، خرطوم کې بند خلک کړېږي.
دا شخړه د سوداني پوځي مشرتابه د دوو لوریو تر منځ د واک پر سر رامنځته شوې.
رپوټونو کې ویل شوي، العبید سیمه کې د متقابلو ډزو له کبله د ملګرو ملتونو کډوالۍ سازمان ادارې یو سودانی کارکوونکی وژل شوی دی.
د جمعې پر ورځ د امریکا پوځي جنرال مارک میلې، چې د امریکايي پوځ مشري کوي، له سوداني پوځي مشر جنرال عبدالفتاح البرهان سره په دې موخه خبرې کړې، چې څنګه وکولای شي، له هغه هېواده د امریکا سفارت کارکوونکي وباسي.
د عکس سرچینه، Reuters
که څه خرطوم نړیوال هوايي ډګر لا هم تړلی پاتې دی، خو اروپايي ټولنې ویلي، دوی پلان لري چې د دې ټولنې غړو هېوادونو د نژدې ۱۵۰۰ کارکوونکو ایستلو لپاره لاس پر کار شي.
دغه راز تر اوسه د امریکا، بریتانیا او جاپان سفارتونه نه دي توانېدلي هلته خپل مېشت وګړي، له دې هېواده وباسي.
د سودان پلازمېنه خرطوم کې د کوچني اختر په مناسبت د اوربند له غوښتنو سره سره د سیالو وسله والو ځواکونو تر منځ تاوتریخوالي زور اخیستی دی.
د چټک ملاتړ ځواک (ار ایس ایف) وویل، دوی درې ورځنی اوربند منلی دی او څو ساعتونه وروسته پوځ همداسې وکړل، خو له دې سره سره بمباري، د توپخانې او ټوپکو ډزې روانې وې.
