تاسې د وېبسایټ داسې بڼه ګورئ چې یوازې متن لري او لږ انټرنېټ کاروي. که غواړئ عکسونه او ویډیوګانې وګورئ، نو د وېبسایټ اصلي (لومړنۍ) بڼې ته ورشئ.
د وېبسایټ اصلي بڼې ته مې وروله
د وېبسایټ دې بڼې په اړه چې ډېر انټرنېټ نه مصرفوي نور معلومات دلته موندلای شئ.
اروپايي ټولنه: پوتین باید پر اوکرایین د یرغل لوړه بیه پرې کړي
اروپايي ټولنې پر اوکرایین د یرغل له کبله پر روسیې د نورو نویو بندیزونو لګولو اعلان وکړ. دغو بندیزونو کې د روسیې پوځي افسران، رسنۍ، بانکونه او د تېلو صنعت په نښه شوی دی.
دا به پر مسکو د اروپایې ټولنې د بندیزونو شپږمه ټولګه وي.
د اروپايي کمېسیون مشرې اورسولا وون دیر لیین د بندیزونو د دې ټولګې په اړه د جزئیاتو ورکولو پر مهال وویل راتلونکو ورځو کې به پرې هوکړه وشي.
دغو بندیزونو کې د روسیې څلور برخې په نښه شوي.
د اروپايي کمېسیون مشرې ویلي جګپوړي روسي پوځي افسران به چې د دې په وینا بوچا او ماریوپول کې یې جنګي جرمونه کړي دغو بندیزونو کې هدف وګرځي.
هغه وویل: "موږ پوهېږو چې تاسې څوک یاست، همداسې نه پاتې کېږئ."
د دغو بندیزونو په لړ کې به د روسیې تر ټولو ستر 'سبېر بانک' هم د بانکي راکړې ورکړې له سویفټ سیستمه بهر کړل شي.
همدا راز ټاکلې چې د اروپايي ټولنې غړو هېوادونو کې د کېبل، سپوږمکۍ او انټرنېټ له لارې د روسیې د دریو سترو دولتي رسنیو خپرونې هم بندې شي.
اغلې اوسولا دا رسنۍ تورنې کړې ګوندې د دې په خبره د "پوتین درواغ پیاوړې کوي".
د اروپايي کمېسیون مشرې دلته دا هم وویل چې اروپايي ټولنه به د روسیې تېلو ته د خپلې اړتیا د پای ته رسولو اعلان وکړي.
هغې وویل دغه کار که څه هم اسان نه دی، خو دوی اړ چې اقدام وکړي.
د نوموړې په خبره اروپايي ټولنه به شپږو میاشتو کې له روسیې د اومه او د ۲۰۲۲ کال تر پایه د چاڼ شویو تېلو واردول ودروي.
