تاسې د وېبسایټ داسې بڼه ګورئ چې یوازې متن لري او لږ انټرنېټ کاروي. که غواړئ عکسونه او ویډیوګانې وګورئ، نو د وېبسایټ اصلي (لومړنۍ) بڼې ته ورشئ.
د وېبسایټ اصلي بڼې ته مې وروله
د وېبسایټ دې بڼې په اړه چې ډېر انټرنېټ نه مصرفوي نور معلومات دلته موندلای شئ.
د امریکا دفاع وزیر: پر اټومي وسلو سمباله شمالي کوریا د زغم نه ده
د امریکا د متحده ایالتونو دفاع وزیر جیمز ماټېس ویلي، هېواد به یې هیڅکله د اټومي وسلو لرونکې شمالي کوریا ونه شي زغملی.
جنرال ماټېس دغه څرګندونې د جنوبي کوریا په پلازمېنه (سيول) کې له ځايي چارواکو سره په لیدنه کې کړې دي.
نوموړي زیاته کړې، د شمالي کوریا توغنديز او اټومي پروګرام د دغه هېواد د امنیت په ګټه نه، بلکې یو ګواښ دی.
د امریکا دفاع وزیر دا خبره هم کړې چې هېواد یې له ډیپلوماټیکو لارو د شمالي کوریا د کړکېچ پای غواړي، خو که شمالي کوریا پر امریکا او ملګرو یې د اټومي ګوزار هڅه وکړي، له دروند او سخت غبرګون سره به مخامخه شي.
د امریکا ولسمشر ډونلډ ټرمپ په دا وروستیو کې ویلي، هېواد کولی شي شمالي کوریا په بشپړ ډول له منځه یوسي.
په روان کال کې د امریکا او د شمالي کوریا د مشرانو ترمنځ لفظې بریدونه بې مخینې وو، خو وروستیو اونیو کې یو څه کم شوي دي.
