تاسې د وېبسایټ داسې بڼه ګورئ چې یوازې متن لري او لږ انټرنېټ کاروي. که غواړئ عکسونه او ویډیوګانې وګورئ، نو د وېبسایټ اصلي (لومړنۍ) بڼې ته ورشئ.
د وېبسایټ اصلي بڼې ته مې وروله
د وېبسایټ دې بڼې په اړه چې ډېر انټرنېټ نه مصرفوي نور معلومات دلته موندلای شئ.
له حلب نه د ولسي کسانو ایستلو وروستی پړاو
د نړیوال سره صلیب چارواکي وايي، تر پنجشنبې یا جمعې پورې به د سوریې حلب ښار له هغو سیمو د ولسي خلکو ایستلو لړۍ بشپړه شي، چې د یاغیانو تر ولکې لاندې دي.
تمه کېږي، چې په حلب کې د پاتې ملکي خلکو ایستلو لپاره به لسګونه بسونه سیمې ته واستول شي.
په حلب کې زرګونه کسان اوس هم له ښاره د وتلو په تمه دي.
د سره صلیب چارواکي وايي، له هغه اوربند راهیسې، چې اته ورځې مخکې پیل شو، تر اوسه پورې له حلب نه ۳۴۰۰۰ کسان وتلي دي.
د سره سلیب نړیوالې کمېټې ' ای سي ار سي ' ویاندې انګې سیډکي رویټرز خبري اژانس ته ویلي:
له حلب ښاره به د ملکي خلکو ایستلو لړۍ د پنجشنبې او ښايي د جمعې پر ورځ هم دوام وکړي. بل لور ته د سوریې حکومت مخالفانو ' احرار الشام ' ډلې ویاند احمد کارا علي رویټرز خبري اژانس ته ویلي، حلب کې اوس هم ګڼ شمېر ملکي کسان شته.
سوریې کې د ملکي خلکو ایستلو عملیاتو کې یوه فعال ډاکټر اې ایف پي خبري اژانس ته ویلي، چې له خان العسل نومي کلي نه چې د یاغیانو په ولکې کې دی، لږ تر لږه ۴۰۰ شخصي ګاډو کې ملکي خلک حلب ته رسېدلي دي.
د ای سي ار سي ویاندې په خبره د ګاډو دغه کاروان کې ۴۰۰۰ کسان شامل دي. نوموړې زیاته کړه:
د خراب موسم، درنې واورې او موټرونو ناسم وضعیت معنی دا ده، چې د ملکي کسانو ایستلو لړۍ د تمې خلاف سوکه روانه ده.
