युक्रेन युद्ध: १० लाखभन्दा बढी मानिसलाई ‘उद्धार गरेको’ रुसी दाबी, जेलेन्स्की पुटिनसँग वार्ताका अझै तयार

रुसका विदेशमन्त्री सर्गेई लाभ्रोभले गत फेब्रुअरी महिनायता युक्रेनबाट १० लाख मानिसहरूलाई उद्धार गरिएको दाबी गरेका छन्।

फेब्रुअरी २४ मा रुसले युक्रेनमाथि आक्रमण गर्न सुरु गरेको थियो। त्यसपछि मस्कोले युक्रेनी नागरिकहरूलाई इच्छाविपरीत सीमापारि लगिरहेको आरोप युक्रेनले बारम्बार लगाउने गरेको छ।

चिनियाँ सरकारी सञ्चारमाध्यमलाई अन्तर्वार्ता दिँदै लाभ्रोभले उद्धार गरिएकामध्ये एक लाख २० हजार विदेशी नागरिक रहेको बताए।

उनका अनुसार त्यसबाहेक रुसले युक्रेनबाट भिन्न भएको दाबी गरेका डोनेत्स्क र लुहान्स्क गणतन्त्रका बासिन्दा पनि छन्।

उनले युक्रेनसँगको द्वन्द्वको समाधान वार्तामार्फत् खोज्ने प्रयासमा पश्चिमी सैन्य गठबन्धन नेटो बाधक रहेको आरोप पुनः लगाएका छन्।

किएभमा रहेका बीबीसीका जोल हन्टरका अनुसार रुसले युक्रेनमा आक्रमण गरेयता ठूलो सङ्ख्यामा मानिसहरूलाई बलजफ्ती आफ्नो सीमातर्फ पठाइरहेको थप प्रमाणहरू फेला परिरहेका छन्।

पुटिनसँग वार्ता गर्न चाहन्छन् जेलेन्स्की

युक्रेनी राष्ट्रपति भोलोदोमिर जेलेन्स्कीले शुक्रवार आफू राष्ट्रपति पुटिनसँग वार्ताका लागि अझै पनि तयार रहेको बताएका थिए।

तर उनले रुसको आक्रामक व्यवहारका कारण वार्ता भङ्ग हुने जोखिम उच्च रहेको बताए।

पोल्यान्डको सञ्चारमाध्यमसँग बोल्दै उनले रुसमा 'एकजना व्यक्तिले मात्रै सबै कुराको निर्णय लिने भएकाले' आफूले पुटिनसँग भेट्न चाहेको बताए।

तर रुसी फौजहरूले रुसी नियन्त्रणमा पुगेका क्षेत्रमा भएको विध्वंसले वार्तालाई थप जटिल बनाएको उनले बताए।

"बुचा र मारिऊपोलपछि मानिसहरू उनीहरूलाई मार्न चाहन्छन्। त्यस्तो मनोदशा भएकाले कुनै पनि विषयमा वार्ता गर्न गाह्रो हुन्छ," उनले भने।

बिहीवार युक्रेनले किएभको उत्तरमा पर्ने बुचामा कम्तीमा ४०० सर्वसाधारणको हत्यामा आरोपित १० रुसी सैनिकको खोजी अघि बढाउने घोषणा गरेको थियो।

युक्रेनका उपप्रधानमन्त्रीले बीबीसीसँग कुरा गर्दै मस्कोले रुसी सैन्य बन्दी र युक्रेनी नागरिक साटफेर गर्ने प्रयास गरेको जनाएका छन्। त्यस्तो कदम जिनिभा महासन्धिबाट वर्जित हुने उनको भनाइ छ।

रुसले शुक्रवार आफ्नो सेनाले राष्ट्रसङ्घीय महासचिव युक्रेनको राजधानीमा रहेकै अवस्थामा एउटा हवाई आक्रमण गरेको पुष्टि गरेको थियो।

त्यसमा एक पत्रकार भिरा हाइर्चको ज्यान गएको थियो। उनी बसेको आवासीय भवनमा क्षेप्यास्त्र लागेको थियो।

रुसी रक्षा मन्त्रालयले किएभमा रहको क्षेप्यास्त्र उद्योगलाई लक्षित गर्दै ठ्याक्कै निसाना लगाउन सक्ने किसिमको लामो दूरीको अस्त्र प्रहार गरेको उल्लेख गरेको थियो।

युक्रेनलाई थप अमेरिकी सहयोग

अमेरिकी विदेशमन्त्रालयले रुसी राष्ट्रपति भ्लादिमिर पुटिनलाई युक्रेनमाथि अतिक्रमण गरेर 'अनैतिक' व्यवहार देखाएको आरोप लगाएका छन्।

प्रवक्ता जन किर्बी रुसले गरेको जघन्य अपराधको औचित्य कुन निष्ठावान् व्यक्तिले पुष्टि गर्न सक्छ भन्दै प्रश्न गरेका थिए।

यसैबीच अमेरिकी राष्ट्रपति जो बाइडनले क्रङ्ग्रेसलाई युक्रेनका लागि ३३ अर्ब डलर बराबरको सैनिक, आर्थिक र मानवीय सहयोगका लागि अनुरोध गरेका छन्।

उक्त प्रस्ताव घरेलु प्राथामिकतासम्बन्धी विवादका कारण कङ्ग्रेसमा अड्किएको छ तर संसद्की सभामुख न्यान्सी पलोसीले यथासम्भव चाँडो त्यसलाई पारित गराउने अपेक्षा आफूले गरेको बताएकी छन्।

किएभमा राष्ट्रपति जेलेन्स्कीले उक्त विधेयकको अनुमोदनले स्वतन्त्रताले दमनविरुद्ध आफ्नो प्रतिरक्षा गर्न सक्ने 'ठोस प्रमाण' दिने बताएका छन्।

यूकेले रुसको निरन्तरको अतिक्रमणविरुद्ध पश्चिमा विश्व एकमत रहेको सन्देश दिने उद्देश्य सहित झन्डै ८,००० सैनिकलाई पूर्वी युरोपमा सैन्य अभ्यासका लागि खटाउन लागेको जनाएको छ।

यो पनि हेर्नुहोस्