तपाईँ अहिले हाम्रो वेबसाइटको थोरै डेटा प्रयोग हुने ‘टेक्स्ट-ओन्ली’ साइटमा हुनुहुन्छ। सबै तस्बिर र भिडिओसहित मूल वेबसाइटमा जान यहाँ क्लिक गर्नुहोस्।
मूल वेबसाइट तथा पूरा संस्करणमा जानुहोस्।
हाम्रो वेबसाइटको थोरै डेटा प्रयोग हुने संस्करणबारे थप जान्नुहोस्।
ब्रेक्जिट: ब्रिटेनकी प्रधानमन्त्री टरिजा मेको ब्रेक्जिट सहमति संसद्बाट अस्वीकृत
ब्रिटेनको संसद्ले प्रधानमन्त्री टरिजा मे सरकारको ब्रेक्जिट सहमतिलाई धेरै मतले पराजित गर्दै ब्रिटेन युरोपेली सङ्घ ईयूबाट अलग हुने योजनाका आवश्यक प्रक्रियाहरूलाई अनिश्चित बनाइदिएको छ।
ईयूसँग मेले गरेको ब्रेक्जिट सहमतिका कैयौँ विषयमाथि सांसदहरूले असहमति जनाएपछि संसद्मा मे सरकारको प्रस्ताव २३० मतले पराजित भएको हो।
ब्रिटिश प्रधानमन्त्री टरिजा मेको ब्रिटेन युरोपेली सङ्घ ईयूबाट बाहिरिने प्रस्तावको पक्षमा २०२ र विपक्षमा ४३२ मत परेका थिए।
यो बहालवाला सरकारको अहिलेसम्मकै ठूलो हार मानिएको छ।
सरकारविरुद्ध अविश्वासको प्रस्ताव
मेले अहिलेको संसदीय पराजयले सन् २०१६ मा ब्रिटेन ईयूबाट अलग हुने पक्षमा ब्रिटेनका जनताले दिएको अभिमतबारे केही नबोलेको प्रतिक्रिया दिएकी छन्।
"सरकारले आज राति संसद्ले भनेको कुरा सुनेको छ। तर म यहाँहरू सबैलाई ब्रिटेनका जनताले भनेको कुरा सुन्न आग्रह गर्दछु र ठिक त्यही काम गर्न अनुरोध गर्छु," उनले भनिन्।
यो पराजयलगत्तै ब्रिटेनमा प्रमुख प्रतिपक्षी लेबर पार्टीका नेता जेरेमी कोर्बिनले दर्ता गराएको अविश्वासको प्रस्तावमाथि संसद्मा बुधवारबाट छलफल हुने कार्यक्रम छ।
ब्रिटेनको संसद्मा प्रधानमन्त्री मेको हारबारे प्रतिक्रिया आउने क्रम जारी रहँदा ईयूका नेताहरूले दु:ख प्रकट गरेका छन्।
मेलाई हारको धक्का
अर्कोतिर अब ब्रिटेनले दश हप्ताभन्दा थोरै समयपछि ईयू छोड्ने भएपछि स्कट्ल्यान्डका प्रथम मन्त्री निकोला स्टर्जनले प्रधानमन्त्री टरिजा मेलाई ब्रेक्जिटका सबै प्रक्रिया स्थगन गरी ब्रिटेनले ईयू छोड्ने कि नछोड्ने भन्ने विषयमा अर्को जनमत सङ्ग्रह आयोजना गर्न आग्रह गरेकी छन्।
ब्रिटेन ईयूबाट बाहिरिने सहमतिका लागि दुई वर्षभन्दा लामो समयदेखि जोडतोडले लागिरहेकी प्रधानमन्त्री मेले हारको ठूलो धक्का सामना गरिरहेकी छन्।
मेको योजना अनुसार आगामी मार्च २९ बाट ब्रिटेन ईयूबाट औपचारिक रूपमा बाहिरिने र त्यसपछि स्वतन्त्र व्यापार सहमतिका लागि २१ महिने सङ्क्रमणकाल लागु हुने भन्ने थियो।
गत डिसेम्बरमै सो मतदान हुने बताइएको थियो। तर प्रधानमन्त्री मेले धेरै सांसदहरूको समर्थन जुटाउने अपेक्षासहित केही ढिला गरेकी थिइन्।
अडिग छिन् मे
ब्रिटेन अझै पनि २९ मार्चमा ईयूबाट बाहिरिने बाटोमा छ।
तर पक्षभन्दा विपक्षमा धेरै सांसदहरू देखिएपछि बहिर्गमनको तरिका र समयबारे थप शङ्काहरू भने बाँकी नै छन्।
बीबीसीका राजनीतिक सम्वाददाता भन्छन् प्रधामन्त्री मे आफ्नो स्वतन्त्र व्यापार नीतिमा अडिग रहन चाहन्छिन् त्यो लेबर पार्टीको नीतिसँग मेल खाँदैन।
मेसँग आफूले ईयूसँग गरेको सहमति परित्याग गर्ने उत्साह पनि निकै कम छ।
