हङ्‌कङमा देशद्रोहको मुद्दामा कसकसले पाए जेल सजाय

हङ्‌कङमा एउटा अदालतले त्यहाँका प्रमुख प्रजातन्त्रवादी नेता तथा कार्यकर्तालाई देशद्रोहको अभियोगमा १० वर्षसम्मको जेल सजाय सुनाएको छ। राष्ट्रिय सुरक्षाको मुद्दामा भएको विवादास्पद सुनुवाइपछि उनीहरूलाई यसअघि नै दोषी ठहर गरिएको थियो।

सजाय पाउनेमा 'हङ्‌कङ ४७' भनिने समूहका बेनी ताई र जोशुआ वङसहित ४५ जना छन्। ताईलाई १० वर्ष र वोङलाई चार वर्षभन्दा बढीको जेल सजाय हुने भएको छ।

उक्त समूहले स्थानीय चुनावमा प्रतिपक्षी उम्मेदवारहरू उठाउन खोजेको थियो। उनीहरूको अभियानमा कुल ४७ जना प्रतातन्त्र पक्षधर कार्यकर्ता, प्रतिपक्षी सांसद र सर्वसाधारण सहभागी थिए।

उनीहरू देशद्रोहको षड्यन्त्र गरेको अभियोगमा दोषी ठहर भएका थिए भने।

उनीहरूविरुद्ध तीन वर्षअघि मुद्दा परेको थियो। केही महिनाअघि ४७ अभियुक्तमध्ये दुई जनाले जनाले सफाइ पाएका थिए।

अधिकारीहरूले आठ महिला र ३९ पुरुष गरी कुल ४७ जनाविरुद्ध सन् २०२० मा सरकार फ्याल्न खोजेको आरोप लगाउँदै मुद्दा हालेका थिए।

चिनियाँ कानुनको व्यापक प्रयोग

उनीहरूको मुद्दामा भएको सुनुवाइ र सजायलाई सन् २०१९ मा हङ्‌कङमा भएको व्यापक प्रजातान्त्रिक प्रदर्शनपछि चीनले लागु गरेको राष्ट्रिय सुरक्षासम्बन्धी कानुनको व्यापक प्रयोग मानिएको छ। पर्यवेक्षकहरू यसबाट हङ्‌कङमा प्रजातन्त्र पक्षधर आन्दोलन र त्यहाँको कानुनी शासन निकै कमजोर हुने ठान्छन्।

उनीहरूका अनुसार यसबाट हङ्‌कङमा चीनलाई आफ्नो नियन्त्रण बढाउन अझ सजिलो भएको छ।

अमेरिकाले यो सुनुवाइलाई "राजनीतिक रूपमा प्रेरित" भनेको छ।

बेइजिङ र हङ्‌कङ सरकारले उक्त क्षेत्रमा स्थायित्व कायम राख्नका लागि राष्ट्रिय सुरक्षा कानुन आवश्यक भएको दाबी गर्दै आएका छन्।

त्यसले हङ्‌कङको स्वायत्तता कमजोर नहुने उनीहरूको दाबी छ। उनीहरूले यो फैसलालाई चीनको राष्ट्रिय सुरक्षालाई कमजोर पार्न खोज्ने शक्तिविरुद्धको चेतावनीका रूपमा अर्थ्याएका छन्।

प्रजातन्त्र पक्षधर कार्यकर्ताविरुद्धको उक्त मुद्दाले धेरै हङ्‌कङवासीको ध्यान तानेको थियो। मुद्दाको फैसला हुनुभन्दा केही दिनअघि दर्जनौँ मानिसहरू अदालतबाहिर लामबद्ध समेत भएका थिए।

मङ्गलवार सजाय सुनाइएका अन्य चर्चित प्रजातन्त्रवादी कार्यकर्ताहरूमा ग्वेनेथ हो पनि छन्। उनी पूर्वपत्रकार हुन् र पछि राजनीतिमा सक्रिय भएका थिए।

त्यस्तै पूर्वविधायक क्लाउडिया मो र लिउङ क्वोक-हुङलगायतलाई पनि सजाय सुनाइएको छ।

उनीहरूले चारदेखि सात वर्षसम्मको जेल सजाय पाएका छन्।

चिनियाँ सुरक्षा कानुनमा के छ

हङ्‌कङमा ठूलो विरोधप्रदर्शन भएपछि सन् २०२० मा चीनले हङ्‌कङका लागि नयाँ राष्ट्रिय सुरक्षा कानुन बनाएको थियो।

उक्त कानुनले हङ्‌कङको स्वायत्ततालाई सीमित पारिदिँदै विरोधमा गरिने विभिन्न गतिविधिलाई अवैध बनाइदियो।

उक्त कानुनले चारथरी गतिविधिलाईआजीवन कारावाससम्म हुने गरी दण्डनीय अपराध मानेको छ।

हङ्‌कङमा कहिले के भयो

बीबीसी न्यूज नेपाली यूट्यूबमा पनि छ। हाम्रो च्यानल सब्स्क्राइब गर्न तथा प्रकाशित भिडिओहरू हेर्न यहाँ क्लिक गर्नुहोस्। तपाईँ फेसबुक, इन्स्टाग्राम र ट्विटरमा पनि हाम्रा सामग्री हेर्न सक्नुहुन्छ। अनि बीबीसी नेपाली सेवाको कार्यक्रम बेलुकी पौने नौ बजे रेडिओमा सोमवारदेखि शुक्रवारसम्म सुन्न सक्नुहुन्छ।