‘घर नै थर्काउनेगरी आएको जहाज खोँचमा गएर पड्कियो’

आइतवार दिउँसोसम्म पोखराको घारीपाटनबाट धुवाँको बाक्लो कालो मुस्लो उडिरहेको देखिन्थ्यो। तर केही डढेको नमिठो गन्ध अझै बाँकी छ।

घारीपाटनस्थित एउटा घरको कम्पाउन्डभित्रै विमानको झ्यालका टुक्रा, चिया खाने कप र डढेका केही सामानहरू उछिट्टिएर आइपुगे। त्यसपछि कमला गुरुङका छोराछोरी आत्तिएर घरभित्र पसे।

“उनीहरू निकै डराएका छन्। मेरो पनि मन आत्तिएको छ। आँखैअगाडि प्लेन जलेको देखेँ,” ४३ वर्षीया गुरुङले बीबीसीसँग सुनाइन्।

उनलाई समय ठ्याक्कै याद छैन, तर बिहान पौने ११ बजेसम्म सबैकुरा सामान्य थियो। सधैँजस्तो उनी घरको छतमा आफ्ना छोराछोरीसँग घाम तापेर बसेकी थिइन्। उनको घरबाट प्राय सधैँ विमानको आवाज चर्को सुनिन्छ।

तर आइतवार बिहान विमानको आवाज निकै अस्वाभाविक सुनिएको कारण आफूले आकाशतिर हेरेको उनले बताइन्।

“के भएछ भनेर हेर्दा प्लेन त छतमै खस्छ जसरी आइरहेको थियो। मैले अरू बेला प्लेन त्यसरी कोल्टिएको कहिल्यै देखेकी थिइनँ,” उनले भनिन्।

आफूले हेर्दाहेर्दै विमान सेती नदीको खोँचतिर जोतिएको उनले बताइन्।

“प्लेन तलतल गएपछि ठूलो आवाज आयो। त्यसपछि केहीबेर धुवाँको कालो मुस्लो मात्र देखिएको थियो। एकैछिनमा आगो पनि बल्न थाल्यो।”

“झ्यालका सिसा, चियाको मग र डढेको चोइटाहरू हाम्रो बारीसम्मै आइपुगेका छन्,” उनले थप भनिन्।

घर जोगिनु 'भाग्य'

त्यसको केही बेरमै पोखरामा यति एअरलाइन्सको विमान दुर्घटनामा परेको खबर सबैतिर फैलियो।

विमानमा चालकदलका चार सदस्यसहित ७२ जना सवार थिए।

नागरिक उड्डयन प्राधिकरणका अनुसार विमान बिहान १०:५० बजे अन्तिम पटक सम्पर्कमा आएको थियो।

उक्त विमान अवतरण गर्न १० देखि २० सेकेन्ड मात्रै रहँदा दुर्घटना भएको पोखरा अन्तर्राष्ट्रिय विमानस्थलका एक अधिकारीले बीबीसीसँग बताए।

घारीपाटन वडा नं ७ का ८७ वर्षीय बबरजङ्ग गुरुङ उक्त विमान “आफ्नै घरमा ठोक्किएला जसरी आएको” बताउँछन्।

तर आत्तिएर आँगनमा निस्किँदा उनले आफ्नोभन्दा "दुई घर अगाडिबाटै" विमान फर्किएको देखे।

“जहाज घर नै थर्काउनेगरी आवाज निकालेर आएको थियो। किन यसरी आयो भनेर सोच्दासोच्दै फनक्क फर्कियो र खोँचमा गएर पड्कियो,” गुरुङले बताए।

घटनास्थलबाट मुस्किलले २०० मिटर मात्र पर केही अग्ला घरहरू छन्। विमान त्यहाँ “भाग्य" ले नठोकिएको अर्का स्थानीयवासी बलबहादुर गुरुङ बताउँछन्।

"प्लेन निकै तलबाट आएको थियो। कोल्टिँदै खोँचतिर गएको थियो एक्कासि बम जसरी पड्कियो। आसपासको जङ्गलमा समेत आगो सल्कियो।”

त्यसको केही बेरमै बस्तीदेखि घटनास्थलसम्मै मानिसहरूको घुइँचो लाग्यो। सुरक्षाकर्मीहरू केही मिनेटपछि त्यहाँ पुगेको आफूले देखेको गुरुङले बताए।

आफूहरूले विमानमा चढेका मानिसरूका लागि कामना गरेको कमला गुरुङले बताइन्।

विमानमा चढेकामध्ये ६८ जनाको शव फेला परिसकेको नागरिक उड्डयन प्राधिकरणले जनाएको छ।

विमानमा चढेका यात्रुहरू सेती खोँचमा खसेको हुनाले उद्धारकर्मीहरू डोरीमा झुन्डिएर तल गएका छन्।

उद्धारकार्यमा सुरक्षाकर्मीबाहेक सर्वसाधारण मानिस र स्थानीय निकाय पनि खटिएको अधिकारीहरूले बताएका छन्।

नेपालमा भएका केही विमान दुर्घटना