तपाईँ अहिले हाम्रो वेबसाइटको थोरै डेटा प्रयोग हुने ‘टेक्स्ट-ओन्ली’ साइटमा हुनुहुन्छ। सबै तस्बिर र भिडिओसहित मूल वेबसाइटमा जान यहाँ क्लिक गर्नुहोस्।
मूल वेबसाइट तथा पूरा संस्करणमा जानुहोस्।
हाम्रो वेबसाइटको थोरै डेटा प्रयोग हुने संस्करणबारे थप जान्नुहोस्।
मतदान गर्न अपिल गर्दै प्रमुख निर्वाचन आयुक्तले भने, 'अवाञ्छित गतिविधि हुन दिन्नौँ'
प्रमुख निर्वाचन आयुक्त दिनेशकुमार थपलियाले प्रतिनिधिसभा र प्रदेशसभा चुनावलाई निष्पक्ष र भयरहित वातावरणमा सम्पन्न गराउन सबै तयारी पूरा भएको भन्दै निर्धक्क भएर मतदान गर्न मतदातालाई अपिल गरेका छन्।
निर्वाचन आयोगबाट शनिवार सम्बोधन गर्दै उनले निर्वाचनमा भाग लिएर आफ्नो मताधिकार प्रयोग गर्न सबैलाई आग्रह गरेका हुन्।
उनले चुनावलाई स्वच्छ, निष्पक्ष र भयरहित वातावरणमा सम्पन्न गराउन सम्पूर्ण तयारी पूरा भएको बताए।
आइतवार बिहान ७ बजेदेखि सुरु भएको मतदान साँझ ५ बजेसम्म जारी रहने निर्वाचन आयोगले जनाएको छ।
अपिलमा उनले अरू के भने
उनले आचारसंहिता उल्लङ्घन रोक्न सूक्ष्म अनुगमनको काम अघि बढाइएको भन्दै आयोगले निगरानी र नियमन गरिरहेको बताए।
चुनावमा कुनै पनि खालको धाँधली गर्ने वा गर्न प्रयास गर्ने जो कोहीलाई कानुन बमोजिम कारबाही गर्न आवश्यक निर्देशन दिइएको उनको भनाइ छ।
उनले भने, “निर्वाचन प्रतिनिधिमूलक शासन व्यवस्थाको आधारशिला रहेकाले आफूले रोजेको प्रतिनिधिमार्फत शासन सञ्चालन गर्न पाउने जनताको अधिकारलाई निर्वाचनले वैधता प्रदान गर्ने हुँदा आआफ्ना मतदान केन्द्रमा उपस्थित भई निर्धक्क मतदान गर्नुहुन निर्वाचन आयोग पुन सबैलाई अनुरोध गर्दछ।"
आयोगले मतदानको दिन अत्यावश्यक सेवाका लागि सञ्चालन हुने सवारी साधन र सञ्चारकर्मी, पर्यवेक्षक र अनुगमनकर्ताका सवारीसाधनलाई अनुमति लिन नपर्ने व्यवस्था गरेको उनले जानकारी दिए।
नेपाल सरकारले आयोगको सिफारिसमा मङ्सिर ४ र ५ गतेलाई सार्वजनिक बिदा दिने घोषणा गरिसकेको छ।
निजी तथा गैरसरकारी क्षेत्रमा आबद्ध जनशक्ति चुनावमा भाग लिन सकुन् भन्नका लागि त्यस्तो गरिएको प्रमुख निर्वाचन आयुक्तको भनाई छ।
कति छन् मतदाता र मतदानस्थल
चुनाव पर्यवेक्षण गर्न भारत सहित दक्षिण एसियाका कतिपय देशका उच्च अधिकारी नेपाल आइपुगेका छन्।
आइतबार बिहान ७ बजेदेखि सुरु हुने मतदान साँझ ५ बजेसम्म जारी रहने निर्वाचन आयोगले जनाएको छ।
निर्वाचन आयोगले मतदान केन्द्रमा क्यामेरा, मोबाइल, सलाई र लाइटर जस्ता वस्तुलाई निषेधित गरेको छ।
प्रतिनिधिसभा र सात वटा प्रदेशसभाका सदस्य चयनका लागि हुन लागेको चुनावमा ५,६०० भन्दा बढी उम्मेदवार प्रतिस्पर्धामा छन्।
पहिलो हुनेले जित्ने निर्वाचन प्रणाली र समानुपातिक निर्वाचन प्रणाली अन्तर्गत प्रत्येक मतदाताले चार वटा मतपत्रमा भोट खसाल्नुपर्ने व्यवस्था निर्वाचन आयोगले गरेको छ।
यस पटकको चुनावमा १० हजार ८९२ मतदान स्थलहरू राखिएका छन्।
मतदान व्यवस्थित बनाउन २२ हजार दुई सय भन्दा बढी मतदान केन्द्र कायम गरिएको छ।
