Pàrantan Bhail' Ùr an t-Slèibh: "aithisg uabhasach"
- Air fhoillseachadh
Thuirt comhairle nam pàrant aig Bun-sgoil Bhail' Ùr an t-Slèibh gu bheil aithisg a dh'fhoillsich luchd-sgrùdaidh air an sgoil an t-seachdain seo uabhasach, agus dh'iarr iad soillearachadh air Comhairle na Gàidhealtachd.
Thuirt an luchd-sgrùdaidh gum feum comhairle na Gàidhealtachd "gnìomh èiginneach" a dhèanamh mu choinneimh grunn laigsean a fhuair iad.
Thuirt pàrantan gun deach an sgrùdadh a dhèanamh sia mìosan an dèidh don ùghdarras ionadail ceumannan a bharrachd a ghabhail mu choinneimh dhraghan a thog na pàrantan.
"Tha na fhuair Foghlam Alba aig Bun-sgoil Bhail' Ùr an t-Slèibh na chùis bhròin mhòir dhuinn," thuirt na pàrantan ann am brath.
"Tha toraidhean an sgrùdaidh uabhasach, agus tha mar a tha clann Bhail' Ùr an t-Slèibh air am fàiligeadh gar fàgail feargach."
Thuirt Comhairle na Gàidhealtachd gu bheil àrd-oifigich foghlaim ag obair leis an sgoil airson piseach a thoirt air cùisean.
Thuirt neach-labhairt gur e rùn an ùghdarrais ionadal gum bi àrainn ionnsachaidh, gnathan-eòlais agus eadar-obrachadh aig àrd ìre aig clann-sgoile.
Tha pàrantan air a bhith a' togail dhragh, thuirt iad, leis a' Chomhairle mu laigsean san sgoil o chionn dà bhliadhna a-niste, agus iad ag ràdh gu bheil coileanadh ionnsachaidh an cuid chloinne ga mhilleadh.
"Tha sinn ag iarraidh air an ùghdarras ionadail agus na riochdairean taghte againn coinneachadh ri pàrantan sa bhad airson am plana leasachaidh aca a shealltainn dhaibh, agus a mhìneachadh:
Na h-atharrachaidhean sònraichte a thèid a dhèanamh mu choinneimh a' ghnìomha èiginnich a chomharraich an luchd-sgrùdaidh
Dè na leasachaidhean a chì sinn sna sia mìosan a tha romhainn, agus ciamar a nìthear measadh air leasachaidhean
Ciamar, às aonais cheannard-sgoile làn-ùine, a nì a' Chomhairle cinnteach gun tèid leasachadh leantainneach a dhèanamh agus gun tig piseach maireannach air ionnsachadh na cloinne
Ciamar a bheir a' Chomhairle piseach air taic do chloinn le feumalachdan taice a bharrachd"
Thog na pàrantan air mar a tha an sgoil aig cridhe coimhearsnachd a' bhaile, 's nach eil sgoil eile san sgìre a bheir seachad foghlam tro mheadhan na Gàidhlig.
"Tha taic na coimhearsnachd aig an sgoil, agus tha na pàrantan gu math gnìomhach a th' air a bhith ag obair gu deimhinneach airson taic a thoirt do luchd-obrach na sgoile. Tha i air a bhith, agus faodaidh i a bhith a-rithist, na sàr-sgoil," thuirt iad.
Thuirt Comhairle na Gàidhealtachd gun do chuir iad coinneamh air doigh do phàrantan, luchd-cùraim agus comhairlichean ionadail far an cluinn iad mu na thathas a' dèanamh airson piseach a thoirt air cùisean sa sgoil.
Thuirt iad gum bi Ceannard na Sgoile agus Àrd-oifigear Foghlam Bun-Sgoile an làthair.
